Ресейдің Хабаровск қаласында Константин Коротковты еске алуға арналған халықаралық бокс бәсекесі өз мәресіне жетті. Бұл жарыста ерлер арасында Түркістан өңірінің үш боксшысы финалға жолдама алды. Олар: Сәкен Бибосынов, Сағындық Тоғамбай және Нұрлан Сапарбай.
54 келі салмақта өнер көрсеткен Сәкен Бибосынов ресейлік Денис Пальшинді айқын басымдықпен жеңіп, алтын медаль иеленді.
92 келі салмақта ел намысын қорғаған Сағындық Тоғамбай финалда алаң иесі Сергей Слободянмен кездесіп, күміс жүлдеге қол жеткізді. Ал аса ауыр салмақ (+92 келі) дәрежесінде Нұрлан Сапарбай ресейлік Орудж Мамедовпен тартысты жекпе-жек өткізіп, қарсыласынан басым түсіп, чемпион атанды.
Сонымен қатар, 67 келі салмақта жұдырықтасқан Мұхаммедсабыр Базарбайұлы қола медальға ие болды. Әйелдер арасында 66 келі салмақта өнер көрсеткен Аружан Жаңабаева да қола жүлдені еншіледі.
Осылайша, Мырзағали Айтжановтың шәкірттері халықаралық деңгейдегі жарыста табысты өнер көрсетіп, еліміздің абыройын асқақтата түсті.
