Түркістан облысында агроөнеркәсіп кешенін дамыту мен азық-түлік қауіпсіздігін қамтамасыз ету бағытындағы жұмыстар жүйелі түрде жалғасып келеді. Соның нәтижесінде өңірде ауыл шаруашылығы өнімдерін терең өңдеумен айналысатын кәсіпорындардың қатары артып, жергілікті өндірістің экспорттық әлеуеті күшейіп келеді. Мемлекеттік қолдау шараларының тиімділігі жаңа өндіріс орындарының ашылуына, тұрғындарды тұрақты жұмыспен қамтуға және отандық өнімнің бәсекеге қабілеттілігін арттыруға оң ықпал етуде.
Осындай табысты жобалардың бірі – Түркістан облысында жұмысын бастаған «Milkart» сүт өнімдері зауыты. Кәсіпорын 2024 жылы іске қосылып, қысқа уақыт ішінде өңірдегі сүт өнімдерін өндіруші ірі кәсіпорындардың біріне айналуға бағыт алды. Зауыт Түркиядан жеткізілген заманауи технологиялық құрал-жабдықтармен жабдықталған. Бұл өндірістің барлық кезеңінде халықаралық сапа талаптарын сақтауға, өнімнің табиғилығын жоғалтпай өңдеуге және жоғары сапалы тауар шығаруға мүмкіндік береді.
Бүгінде кәсіпорында тәулігіне ондаған тонна табиғи сүт өңделеді. Өндіріс барысында жергілікті шаруалардан жиналған сапалы шикізат пайдаланылады. Соның негізінде халық күнделікті тұтынатын 48 түрлі өнім өндіріледі. Олардың қатарында сүт, айран, қатық, қаймақ, сүзбе, сарымай және өзге де сүт тағамдары бар. Барлық өнім табиғи құрамымен, сапасымен және қолжетімді бағасымен ерекшеленеді.
Кәсіпорын өндірістік көрсеткіштермен қатар әлеуметтік жауапкершілікке де басымдық беріп отыр. Қазіргі таңда зауытта 13 жергілікті тұрғын тұрақты жұмыспен қамтылған. Алдағы уақытта өндіріс көлемінің ұлғаюына байланысты жаңа жұмыс орындарын ашу жоспарланып отыр. Бұл өңірдегі жұмыспен қамту деңгейін арттыруға және халықтың әл-ауқатын жақсартуға өз үлесін қосады.
Бүгінде «Milkart» өнімдері Түркістан және Кентау қалаларының тұрғындарына кеңінен ұсынылуда. Сонымен қатар әлеуметтік дүкендерге, ірі сауда желілеріндегі әлеуметтік бұрыштарға тұрақты жеткізіліп, ауыл шаруашылығы жәрмеңкелерінде тиімді бағамен сатылуда. Бұл тұрғындарды сапалы әрі қолжетімді отандық өніммен қамтамасыз етуге мүмкіндік беріп келеді.
Кәсіпорын алдағы кезеңде өндірістік қуатын төрт есеге дейін арттыруды көздеп отыр. Осы мақсатта қосымша технологиялық желілер іске қосылып, өндіріс үдерісі толықтай жаңғыртылатын болады. Мұндай жаңғырту өнім көлемін арттырып қана қоймай, оның ассортиментін кеңейтуге және халықаралық нарық талаптарына толық сәйкес келетін өнім шығаруға жол ашады.
Өндірісті кеңейту аясында кәсіпорын Өзбекстан, Қырғызстан және Қытай нарығына экспорт көлемін ұлғайтуды жоспарлап отыр. Бұл Түркістан облысында өндірілген табиғи әрі сапалы сүт өнімдерінің халықаралық нарықтағы бәсекеге қабілеттілігін арттырып, экспорттық әлеуетін жаңа деңгейге көтеруге мүмкіндік береді. Экспорттың ұлғаюы өңір экономикасының дамуына, инвестиция тартуға және жаңа жұмыс орындарының ашылуына оң әсер етеді.
Бүгінде Түркістан облысында ауыл шаруашылығы өнімдерін өңдеу саласына ерекше көңіл бөлінуде. «Milkart» секілді кәсіпорындардың дамуы өңірдің өндірістік әлеуетін арттырып қана қоймай, отандық өнімнің сапасын әлемдік деңгейде танытуға мүмкіндік береді. Түркістанда өндірілген табиғи сүт өнімдерінің алдағы уақытта Орталық Азия мен Қытай нарығында өз орнын қалыптастыруы – «Қазақстанда жасалған» бренді беделінің артып, ұлттық өндірістің жаңа белеске көтерілгенінің айқын көрінісі болмақ.
