Ордабасы ауданы – Түркістан өңіріндегі ауыл шаруашылығы қарқынды дамып келе жатқан аймақтардың бірі. Жерінің құнарлылығы мен еңбекқор диқандарының тынымсыз еңбегінің арқасында мұнда жыл сайын мол өнім алуға берік негіз қаланып келеді. Биыл да көктемгі дала жұмыстары жоспарға сәйкес жүйелі түрде жүргізілуде.
Аудан бойынша жалпы 71,2 мың гектар егістік алқапты игеру межеленген. Оның ішінде 26,3 мың гектар күздік дақылдар болса, 33,0 мың гектар алқапқа жаздық дақылдар орналастыру жоспарланған. Бүгінде осы бағыттағы жұмыстар қарқын алып, жаздық дақылдар 28,0 мың гектар алқапқа егілді. Бұл жоспардың 84 пайызға орындалғанын көрсетіп, шаруалардың егіс науқанын дер кезінде әрі ұйымшылдықпен атқарып жатқанын аңғартады.
Егіс құрылымында ауыл шаруашылығы дақылдарын әртараптандыруға ерекше мән берілген. Атап айтқанда, 3,8 мың гектарға дәнді дақылдар, 5,4 мың гектарға майлы дақылдар, 5,3 мың гектарға мақта егілген. Сонымен қатар мал шаруашылығын дамыту мақсатында 2,8 мың гектарға жаңа жоңышқа себілсе, бұрынғы жоңышқа алқаптары 11,8 мың гектарды құрап отыр. Халықты әлеуметтік маңызы бар өнімдермен қамтамасыз ету үшін картоп, көкөніс және бақша дақылдары 5,2 мың гектарға орналастырылған.
Мұндай құрылымдық әртараптандыру ауданның азық-түлік қауіпсіздігін нығайтып қана қоймай, ауыл шаруашылығы өндірісінің тұрақтылығын арттыруға мүмкіндік береді. Шаруалар ауа райының қолайлы сәттерін тиімді пайдаланып, агротехникалық шараларды уақытылы атқаруда.
Көктемгі дала жұмыстарының сапалы жүргізілуінде мемлекеттік қолдаудың рөлі зор. Осы мақсатта «Кең Дала 2» бағдарламасы аясында аудан бойынша 265 жоба қаржыландырылып, шаруалардың егіс науқанын кедергісіз өткізуіне мүмкіндік жасалды. Бұл қолдау ауыл еңбеккерлерінің қаржылық жүктемесін жеңілдетіп, өндірістік белсенділікті арттыруға ықпал етуде.
Сонымен қатар егістік алқаптарды минералды тыңайтқыштармен қамтамасыз ету жұмыстары да кезең-кезеңімен жүзеге асырылуда. Биыл жалпы 71,2 мың гектар жерге 16,2 мың тонна тыңайтқыш енгізу жоспарланған. Қазіргі таңда шаруалар 4,0 мың тоннаға жуық тыңайтқыш сатып алып, егістік алқаптарда тиімді пайдалануда. Бұл өнімділікті арттыруға және жер құнарлылығын сақтауға бағытталған маңызды шаралардың бірі.
Су ресурстарын тиімді пайдалану да басты назарда. Қазіргі таңда ауданда 13 шаруа қожалығы жалпы 2 450 гектар алқапта су үнемдеу технологияларын енгізіп, бидай, көкөніс және бақша дақылдарын өсіруде. Заманауи суару жүйелерін қолдану су тапшылығының алдын алып, өнім сапасын арттыруға мүмкіндік беріп отыр.
Ордабасы ауданында жүзеге асырылып жатқан бұл кешенді шаралар ауыл шаруашылығы саласының тұрақты дамуына негіз болуда. Еңбек пен жүйелі жоспарлаудың нәтижесінде аудан диқандары мол өнім алуға үміт артып отыр. Дала төсіндегі әрбір атқарылған жұмыс – ертеңгі берекелі күздің кепілі болып табылады.
