Түркістан өңірінде ауыл шаруашылығы саласын дамыту бағытындағы жүйелі жұмыстар өз нәтижесін беріп келеді. Әсіресе, су тапшылығы мәселесі өзекті кезеңде су ресурстарын тиімді пайдалану мен заманауи технологияларды енгізу — уақыт талабы. Осы бағытта Келес ауданында ауқымды жобалар жүзеге асырылып, аграрлық секторды жаңа деңгейге көтеруге бағытталған нақты қадамдар жасалуда.
Бүгінде Келес ауданы — ауыл шаруашылығы қарқынды дамып келе жатқан өңірлердің бірі. Жердің құнарын тиімді пайдаланып, еңбек пен технологияны ұштастыра білген шаруалардың табысты жұмысы аудан экономикасына серпін беріп отыр. Өткен жылы аудан көлемінде 22 мың 924 гектар жерге ауыл шаруашылығы дақылдары егілген. Нәтижесінде жалпы өнім көлемі 85,2 миллиард теңгеге жетіп, нақты көлем индексі 105,2 пайызды құрады.
Бұл — диқандардың тынымсыз еңбегі мен мемлекеттік қолдаудың нақты нәтижесі. Ал биыл аудан шаруалары бұдан да жоғары көрсеткіштерге қол жеткізуді көздеп отыр. 2026 жылы ауыл шаруашылығы өнімінің көлемін 92,6 миллиард теңгеге дейін ұлғайту жоспарланған.
Соңғы жылдары өңірдегі ең өзекті мәселелердің бірі — су тапшылығы. Табиғи ресурстарды ұтымды пайдалану ауыл шаруашылығын тұрақты дамытудың басты кепіліне айналып отыр. Осыған байланысты Келес ауданында су үнемдеу технологияларын енгізу жұмыстары қарқынды жүргізілуде.
Өткен жылы ауданда 1 168 гектар жерге тамшылатып және жаңбырлатып суару жүйелері орнатылған. Бұл технологиялар суды үнемдеп қана қоймай, егіннің өнімділігін арттыруға да мүмкіндік береді. Әсіресе, әрбір тамшы судың қадірі артқан қазіргі кезеңде мұндай заманауи тәсілдердің маңызы зор.
Биыл бұл көрсеткішті екі еседен астам ұлғайту жоспарланып отыр. Атап айтқанда, 2026 жылы Келес ауданында 2 мың 530 гектар алқапқа су үнемдеу технологияларын енгізу көзделген. Бұл — өңірдегі аграрлық секторды жаңғыртуға бағытталған маңызды бастамалардың бірі.
Қазіргі таңда ауданда 9 агроқұрылым бойынша нақты жұмыстар жүргізілуде. Жалпы көлемі 993 гектар алқапқа су үнемдеу жүйелерін енгізу жобалары әзірленген. Бұл жобалар ауыл шаруашылығында су ресурстарын тиімді пайдалануға, шығын көлемін азайтуға және өнім сапасын арттыруға мүмкіндік береді.
Солардың қатарында «Бақнұр» жауапкершілігі шектеулі серіктестігінің жобасы ерекше назар аудартады. Кәсіпорынның 120 гектар жерінде су үнемдеу жүйесін орнату бағытындағы құрылыс жұмыстары басталып кеткен. Қазіргі таңда жобаны кезең-кезеңімен іске асыру шаралары қолға алынуда.
Мамандардың айтуынша, тамшылатып және жаңбырлатып суару жүйелері егіс алқаптарына қажетті суды нақты мөлшерде жеткізіп, топырақтың ылғалдылығын тұрақты сақтауға мүмкіндік береді. Бұл әдіс тек суды үнемдеп қана қоймай, тыңайтқыштарды тиімді пайдалануға және өнім көлемін арттыруға оң әсер етеді.
Келес ауданында ирригациялық инфрақұрылымды жаңғырту жұмыстары да жүйелі жүргізіліп келеді. Өйткені су арналары мен қашыртқылардың қалыпты жұмыс істеуі — егіс алқаптарын сумен тұрақты қамтамасыз етудің негізгі кепілі.
Өткен жылы Ошақты, Алпамыс батыр, Біртілек және Ақтөбе ауылдық округтерінде жалпы ұзындығы 49,7 шақырым болатын каналдар мен қашыртқылар механикалық тазалаудан өткізілген. Бұл жұмыстар су өткізу қабілетін арттырып, егістік алқаптарға судың кедергісіз жетуіне мүмкіндік берген.
Ал биыл аудандағы ирригациялық жүйелерді жаңғырту жұмыстары бұдан да кең көлемде жалғаспақ. Жоспарға сәйкес, жалпы ұзындығы 218,5 шақырым болатын ирригациялық желілерді тазарту көзделіп отыр. Бұл — су жүйелерінің тиімділігін арттырып, суармалы жерлердің жағдайын жақсартуға бағытталған маңызды шара.
Жалпы, Келес ауданында қолға алынған жобалар — ауыл шаруашылығы саласын заман талабына сай дамытуға бағытталған нақты қадамдар. Су үнемдеу технологияларын енгізу мен ирригациялық жүйелерді жаңғырту арқылы өңірдің аграрлық әлеуеті артып, шаруалардың табысы көбейе түспек.
Тіршілік нәрін қадірлеген ел ғана ертеңіне сеніммен қарай алады. Ал Келес даласында жүзеге асып жатқан игі бастамалар — табиғатты ұқыпты пайдалану мен еңбек өнімділігін арттырудың жарқын көрінісі. Әр тамшы судың бағасын білген шаруалардың тынымсыз еңбегі аудан экономикасының дамуына жаңа серпін беруде.