Көкшетау төрінде көру қабілеті шектеулі жандар арасында өткен VII Республикалық спартакиада – ерік-жігердің, қайсарлық пен рухтың салтанат құрған шынайы мерекесіне айналды. Аталмыш дода еліміздің әр қиырынан – Астана, Алматы, Шымкент қалалары мен 16 облыстан келген жүзге жуық шахматшыны бір алаңға тоғыстырды. Бұл – мүмкіндігі шектеулі болса да, арманы мен мақсатынан бас тартпаған жандардың мызғымас мұраты мен қажымас қайратын айшықтаған маңызды алаң болды.
Жарыс екі бағытта – жекелей және командалық форматта ұйымдастырылды. Осындай ауқымды бәсекеде Түркістан облысының намысын абыроймен қорғаған азаматтар – Арыс қаласынан шыққан тәжірибелі шахмат шебері, білімді бапкер Асатулла Супбаев, Түркістан қаласының намысты ұланы Жұмаділдаев Қуанышбек және Кентау қаласының дарынды спортшысы Әсел Амангелді болды.
Үшеуі де тас-түйін дайындықпен келіп, шахмат тақтасында тамаша өнер көрсетті. Әр партияда терең ойлау мен батыл шешім қабылдаудың үлгісін көрсеткен жерлестеріміз командалық есепте бірінші орынды иеленіп, Түркістан облысының мерейін үстем етті. Бұл – тек жеңіс емес, төзімді еңбектің, табанды жаттығудың және бірлік пен сенімнің жемісі.
Айта кету керек, осымен жетінші мәрте ұйымдастырылып отырған бұл спартакиада еліміздегі мүмкіндігі шектеулі азаматтардың спортқа деген қызығушылығын арттырып, бұқаралық және кәсіби спортты дамытуға, сондай-ақ салауатты өмір салтын кеңінен насихаттауға бағытталған. Мұндай игі бастамалар – қоғамдағы әлеуметтік теңдікті нығайтып, әрбір азаматтың әлеуетін ашуға мүмкіндік береді.
Біз, өз кезегімізде, жеңімпаз жерлестерімізді шын жүректен құттықтай отырып, алдағы спорттық белестерде де толағай табыстар мен жаңа жеңістер тілейміз. Түркістанның көк байрағын желбіреткен батыр жүректі шахматшылар – сіздер мақтанышқа лайықсыздар!
