Қазақстан Президенті Қасым-Жомарт Тоқаев пен Өзбекстан Президенті Шавкат Мирзиёев Түркістан қаласында бой көтерген жаңа зәулім мешітке барды. Бұл зәулім ғимарат — екі ел арасындағы тамыры терең бауырластық байланыс пен рухани ынтымақтастықтың жарқын айғағы іспетті.
Мемлекет басшылары құлшылық үйінің орталық залында болып, қасиетті Құран аяттары оқылды. Айта кету керек, бұл ғибадат орны — Өзбекстан Президентінің Түркістан жұртшылығы мен барша қазақ халқына жасаған ерекше тартуы. Мешіт құрылысы өзіндік сәулеттік ерекшеліктерімен көз тартады. Құлшылық үйінің сыртқы қасбеті мен ішкі көрінісі дәстүрлі ислам өнерінің элементтерімен, ұлттық ою-өрнектермен және мұсылман каллиграфиясымен ерекше безендірілген.
Мешіт мұнараларының биіктігі 61 метрді құрайды. Тұтас кешен ең соңғы үлгідегі инженерлік желілермен толық жабдықталған.
Сонымен қатар, мешіттің айналасы толық абаттандырылып, заманауи жарықтандыру жүйелері орнатылған. Келушілер үшін арнайы демалыс аймақтары мен тамылжыған субұрқақтар іске қосылған.