Жетісай қаласының жүрегі – «Жетісай» орталық саябағында ұлттық болмысымыздың мәңгілік символына айналған Қара домбыраның құрметіне арналған ерекше мерекелік шара өтті. Ұлттық Домбыра күні – бұл жай ғана мейрам емес, бұл халқымыздың жүрек дүрсілімен үндескен, жан дүниесінің сыры мен мұңын, шаттығы мен армандарын жеткізген қасиетті аспапқа тағзым ету күні. Домбыра – ықылым замандардан бүгінге жеткен қазақ рухының киелі жаны, мыңдаған жылдар бойы сан ұрпақтың шерін тарқатып, ел басына күн туғанда жұбаныш болған, жеңісті сәттерде шаттық әкелген ұлы мұра. Қос ішекке сыйған бүкіл ғалам – қазақтың кешегісі, бүгінгісі мен ертеңі дәл осы қара домбырадан күмбірлеп төгіліп келеді. Қазақ пен домбыра – егіз ұғым, бұл екеуін бір-бірінен бөліп қарау – тамырынан ажыраған бәйтеректей болары анық. Ұлттық Домбыра күніне орай ұйымдастырылған мерекелік іс-шарада «Жетісай сазы» халықтық ұлт-аспаптар оркестрінің өнерпаздары мен аудандық шығармашылық мектептердің жүзге жуық жас домбырашысы бір сәтте күй төгіп, асқақ рухты әуенмен көпшілік көңілін тербеді. Әр пернеге басылған үн, әр шертілген күй қазақ даласының кеңдігін, ұлттың тереңдігін, бабалардың аманатын жеткізгендей болды. Күмбірлеген күйлер әуелеп, Жетісай аспанын әнге бөлеп, жүректерге рух пен мақтаныш ұялатты. Бұл – руханият пен өнердің, ұлттық сана мен тәлімнің тоғысқан тұсы еді. Шара аясында сахна төріне көтерілген Жетісай аудандық мәдениет үйінің басшысы Перизат Тажибаева барша жиналған жұртшылықты мерекемен құттықтап, ұлттық құндылықтарды ұлықтап жүрген аудан өнерпаздарына арнайы алғыс хаттар табыстап, рухани еңбектері мен өнерге деген адалдықтарына алғысын білдірді. Осындай мағынасы терең, мазмұны бай мерекелер – тек бір күндік іс-шара емес, ұлттың жадын жаңғыртып, болашақ ұрпақтың жүрегіне рух дарытатын өміршең дәстүр. Қара домбыраның күмбірі ешқашан тынбасын, ал оның үнін жалғайтын ұрпақ көбейе берсін!
Қасиетті Қара Домбыраның Күмбірі – Жетісай Аспанында
