Шілденің шырайлы күндерінде Қырғызстанның астанасы – Бішкек қаласында күрес түрлерінен 15 жасқа дейінгі жасөспірімдер арасында өткен Азия чемпионаты спорт сүйер қауымды елең еткізген айтулы дода болды. Сары құрлықтың сайдың тасындай іріктелген үздік балуандары бозкілем төрінде шеберліктерін сынға салып, әр мемлекеттің абыройы мен намысын қорғар нағыз мықтыларды анықтады. Осындай дүбірлі додада Қазақстан Республикасының ұлттық құрамасы сапында Жетісай ауданындағы №2 балалар мен жасөспірімдер спорт мектебінің жас дарынды спортшысы – Үркімбай Жасұлан да ел сенімін арқалап, 75 келі салмақ дәрежесінде күресіп, керемет өнер көрсетті. Талантты жас балуан дода барысында нағыз қайсарлықтың, төзім мен табандылықтың үлгісін танытып, барын салып белдесті. Нәтижесінде, ол жүлделі үшінші орынды иеленіп, Азия чемпионатының қола медаліне қол жеткізіп, туған елінің көк байрағын көкке көтерді. Бұл – Жасұланның алғашқы ірі халықаралық жеңісі ғана емес, келешекте үлкен ареналарда жарқырайтын жұлдызының жанғанын білдіретін қуанышты сәт. Бұл жетістік – оның жеке еңбегінің, тынымсыз тер төгіп жасаған жаттығуларының, сондай-ақ білікті жаттықтырушысы Аққұлы Ерсіннің бағыт-бағдар берудегі кәсіби шеберлігінің айқын жемісі. Біз болашағынан зор үміт күттіретін жас спортшыны және оның бапкерін шын жүректен құттықтай отырып, алда да толағай табыстар, биік белестер тілейміз. Жетісай жерінен шыққан Жасұлан сынды жалынды ұландар еліміздің спорттағы даңқын асқақтата беретініне сенім мол!
Жетісай Жерінен Жарқыраған Жас Жұлдыз
