Түркістан қаласының көгілдір көлеңкелі жазғы демалысын рухани байлықпен көркейткен тағы бір тағылымды іс-шара – Ыбырай Алтынсарин атындағы облыстық балалар кітапханасының бастамасымен ұйымдастырылған «Саябақтағы кітапхана» жобасы. Ашық аспан астында өткен бұл әдеби-танымдық кездесу – балғын оқырмандарды кітаппен етене таныстырып, олардың жазғы демалысын мазмұнды да мағыналы етіп өткізуге бағытталған тың бастама.
«Жібек жолы» ойын-сауық саябағының көркем бұрышы бір сәтке балалардың шат күлкісіне, кітап беттерінен төгілген сырлы сөздерге, ойын мен ойдың жарысына толы алаңға айналды. Шара барысында әр жас санатына сай кітап көрмелері жасақталып, оқырмандарға әдебиеттің алтын қазынасымен жақын танысуға мол мүмкіндік берілді. Әсіресе балаларға арналған ертегілер, танымдық кітаптар мен қызықты энциклопедиялар көпшіліктің қызығушылығын тудырды.
Кітапхана қызметкерлері тарапынан ұйымдастырылған интерактивті ойындар, логикалық тапсырмалар мен әдеби сұрақ-жауаптар балалардың ойын сергітіп қана қоймай, олардың таным көкжиегін кеңейтіп, шығармашылық қабілеттерін шыңдай түсті. Кішкентай оқырмандар түрлі тапсырмаларды ерекше белсенділікпен орындап, көпшілік алдында өз білімдерін көрсетуге ынтызар болды. Бұл шара – балалар үшін білім мен демалысты ұштастырған шабыт алаңына айналды.
Кешке ата-аналар да ерекше қызығушылық танытып, балаларымен бірге кітап көрмесін тамашалап, кітапхана қызметкерлерінен кеңес алды. Олар өз балаларының оқуға деген ынтасы артып келе жатқанын айтып, мұндай шаралардың тұрақты түрде өткізіліп тұруына қолдау білдірді. Сондай-ақ бұл күнгі әдеби кездесуге «Тиянақты кітапханашы» жазғы оқу курсының қатысушы мамандары да арнайы келіп, өзара тәжірибе алмасып, шара барысына белсене араласты.
Жобаның басты мақсаты – кітапты халыққа жақындату, балалардың бос уақытын тиімді өткізуіне мүмкіндік беру және олардың кітапханаға деген қызығушылығын арттыру. Кітапхана қызметкерлері бұл бастаманың тек бір реттік емес, жаз бойы әр апта сайын, бейсенбі күндері қаланың әр саябағында жалғасын табатынын атап өтті. Бұл – жазғы демалысты мазмұнды әрі тәрбиелік мәні зор бағытта өткізуге бағытталған жүйелі жұмыстардың бір бөлігі.
Сонымен қатар, кітапхана ұжымы жаз мезгілінде ең көп кітап оқыған белсенді оқырмандарды арнайы марапаттармен және естелік сыйлықтармен ынталандырып отыруды қолға алған. Мұндай көтермелеу – бала жүрегінде кітапқа деген қызығушылық пен сүйіспеншілікті одан әрі арттыратыны сөзсіз.
