Тарих тереңінен тамыр тартқан қасиетті Түркістан өлкесі тәуелсіз Қазақстан тарихында жаңа бір маңызды белесті еңсеріп отыр. 2018 жылдың 19 маусымында Мемлекет басшысы Түркістан облысын құру туралы тарихи Жарлыққа қол қойып, Түркістан қаласын облыс орталығы ретінде бекітті. Осы сәттен бастап күллі түркі дүниесінің рухани жүрегіне айналған Түркістанның жаңа дәуірі басталды. Міне, сол тағдырлы шешімнің қабылданғанына жеті жыл толып отыр. Осы қысқа мерзімде Түркістан өңірі жаңғыру мен дамудың үлгісіне айналып, еліміздің әлеуметтік-экономикалық картасында жарқын жетістіктерімен даралана түсті.
Бүгінде Түркістан облысы – көз алдымызда жаңарып, түлеп жатқан ең жас әрі ең серпінді дамып келе жатқан аймақтардың бірі. Облыстың жалпы өңірлік өнімі соңғы жеті жыл ішінде 2,6 есеге өсіп, 4,5 триллион теңгеге жетті. Егер 2018 жылы бұл көрсеткіш 1,7 трлн теңге болса, бүгінде бұл сан бірнеше есеге ұлғайып, өңірдің экономикалық әлеуетінің артуына куә болудамыз. Өнеркәсіп өндірісі де айтарлықтай серпін алып, жеті жылда 2,7 есеге өсіп, 1 214 миллиард теңгеге жетті. 2018 жылы бұл салада 438,6 млрд теңгенің өнімі өндірілген еді.
Индустрияландыру бағытында да нақты нәтижелерге қол жеткізілді. Облыс аумағында инфрақұрылыммен толық қамтылған 19 индустриялық аймақ пен арнайы экономикалық аймақ жұмыс істеуде. Мұнда бүгінде 52 кәсіпорын тұрақты түрде өнім өндіріп отыр. Сонымен қатар жалпы құны 195,4 миллиард теңгені құрайтын 57 жаңа жобаның құрылысы жүргізілуде. Бұл жобалар аймақтың өндірістік әлеуетін арттырумен қатар, жаңа жұмыс орындарын ашуға да жол ашпақ. Ал алғаш рет жүзеге асқан 100 гектар аумақтағы «Шағын өнеркәсіптік парк» жобасы – шағын және орта бизнесті дамытуға берілген үлкен мүмкіндік.
Ауыл шаруашылығы саласы да өркендеп келеді. Жеті жылда бұл саладағы өнім көлемі екі есеге артып, алғаш рет 1 триллион теңгеден асып түсті. 2018 жылы бұл көрсеткіш 548,7 миллиард теңгені құраған еді. Түркістан облысы бүгінде ауыл шаруашылығы бойынша республикада алдыңғы қатарда тұр. Агроөнеркәсіп кешеніне тартылған инвестиция көлемі де қомақты – соңғы жеті жылда бұл салаға 700 миллиард теңге көлемінде қаржы құйылған.
Инвестиция тарту – экономикалық дамудың басты тетігі екені белгілі. Осы бағытта облыс елеулі табыстарға қол жеткізді. 2018 жылдан бері тартылған инвестициялар көлемі 4,2 есеге артып, 1 триллион 335 миллиард теңгені құрады. Бұл көрсеткіш 2018 жылы 314,1 миллиард теңге шамасында болған. Тек биылдың өзінде облысқа 387,8 миллиард теңге инвестиция тартылған, оның ішінде 199,3 миллиард теңгесі – жеке, ал 128,7 миллиард теңгесі – мемлекеттік қаржы. Түркістанның ашық әрі сенімді инвестициялық аймаққа айналғанын шетелдік кәсіпкерлер де жоғары бағалауда. Оған дәлел – тартылған тікелей шетелдік инвестиция көлемінің 1 миллиард 144,2 миллион АҚШ долларына жетіп, белгіленген жылдық жоспардан 245 пайызға асыра орындалуы.
Туризм – Түркістанның басты бағыттарының бірі. Соңғы жеті жыл ішінде бұл салаға 442,6 миллиард теңге инвестиция салынды. Жүздеген нысан бой көтеріп, мыңдаған адамға тұрақты жұмыс орны ашылды. Бүгінде бұл көрсеткіш 18,1 мың адамды құрап отыр. Түркі әлемінің рухани астанасы саналатын Түркістан қаласының көркі жыл санап ажарланып, жаһандық деңгейдегі туристік орталыққа айналып келеді.
Қаланың өзінде соңғы жеті жыл ішінде 100 мың адамға лайықталған заманауи инфрақұрылым тартылып, жаңа тұрғын үйлер мен әлеуметтік, мәдени, спорттық нысандар бой көтерді. Қалада балабақшалар мен мектептер, ауруханалар мен дене шынықтыру кешендері салынып, халықтың өмір сүру сапасы арта түсті. Мемлекет басшысының бастамасымен Түркістан қаласына ерекше мәртебе беріліп, арнайы Заң қабылданды. Бұл құжат қаланың дамуына құқықтық негіз болып, тарихи шаһардың сәулеттік келбетін жаңғыртуға тың серпін берді.
Бүгінде Түркістан – Орталық Азиядағы ең көрікті де заманауи қалалардың біріне айналып, тарихи жәдігерлері мен заманауи сәулеті үндескен, руханият пен өркениеттің тоғысқан мекені ретінде жарқырап тұр. Облыс аумағындағы ауыл-аймақтар да жаңғыру үстінде. Инфрақұрылым жақсарып, жолдар жөнделіп, тұрғындардың тұрмыс сапасы айтарлықтай жақсаруда.
Осынау жеті жыл ішінде Түркістан облысы тәуелсіз Қазақстанның даму жолында өз орнын айқындап, ауқымды істердің арқасында елдің сенімін ақтап келеді. Бұл жетістіктер – жүйелі саясаттың, қажырлы еңбектің және ел бірлігінің жемісі. Алдағы уақытта да Түркістан өңірі жаңару мен өркендеудің жарқын жолын жалғастырып, ұлы мұраттар жолында биік белестерді бағындыра бермек.
