Созақ ауданы әкімдігінің мәжіліс залында Қазақстан Республикасы Адам құқықтары жөніндегі уәкілдің Түркістан облысы бойынша өкілі Наталья Қожабекованың қатысуымен «Еңбекті қорғау жүйесіндегі түйінді тенденциялар мен негізгі перспективалар» тақырыбында дөңгелек үстел өтті. Іс-шараға аудан аумағындағы өндіріс орындарының өкілдері қатысты.
Жиынды аудан әкімінің орынбасары Серік Маманов ашып, жүргізді. Шара барысында ҚР Адам құқықтары жөніндегі уәкілдің өкілі Наталья Сұңғатқызы адам құқықтары мен бостандықтарын қорғауға бағытталған қолданыстағы заңнама туралы айтып, қоғамдағы азаматтардың құқықтарын сақтау мен қамтамасыз етудің өзекті мәселелеріне тоқталды.
Сонымен қатар «Қызмет» мемлекеттік, банк мекемелері және қоғамдық қызмет көрсету қызметкерлерінің салалық кәсіподағы» қоғамдық бірлестігінің Түркістан облысы, Созақ аудандық филиалының төрағасы Мыңжасар Асқаров Еңбек кодексіндегі азаматтардың құқықтарына қатысты негізгі баптарды түсіндірді.
Жиынға қатысқан өндіріс орындарының өкілдері өз кәсіпорындарындағы еңбек құқықтарын сақтау бағытындағы профилактикалық шаралар туралы мәлімет беріп, еңбек қауіпсіздігін қамтамасыз ету бойынша тәжірибелерімен бөлісті.
