Түркі халықтарының рухани астанасы, соңғы жылдары жаңғыру мен жаңару дәуірін бастан өткеріп жатқан Түркістан қаласында қаланың тіршілігі үшін аса маңызды салалардың бірі – кәріз жүйесін жаңғырту бағытында ауқымды жұмыстар қолға алынған. Жуырда Түркістан қаласының әкімі Әзімбек Пазылбекұлы арнайы брифинг өткізіп, 2025 жылдың алғашқы бес айында атқарылған әлеуметтік-экономикалық жұмыстардың барысын баяндады. Солардың ішінде көпшіліктің назарын аударған тақырыптың бірі – қаланың кәріз инфрақұрылымын жаңарту және кеңейту мәселесі болды.
2020–2025 жылдарға жоспарланған инженерлік-инфрақұрылымдық даму аясында Түркістан қаласында сарқынды су жүйелерін жаңарту жұмыстары жүйелі жүргізілуде. Бүгінде ұзындығы 263,3 шақырымды құрайтын жаңа кәріз желілерінің құрылысы қарқын алған. Бұл тек магистралды бағыттармен шектелмей, ішкі орам көшелерді де қамтып отыр. Жобаның басты мақсаты – қаланың барлық аумағын сапалы әрі үздіксіз қызмет көрсететін кәріз жүйесімен қамтамасыз ету.
Кең ауқымды жоба аясында болашақта 5 бірлік сарқынды суларды тазарту имараты, 21 канализациялық сорғы станциясы және 4 шығын реттегіш құдық бой көтермек. Бұл нысандардың іске қосылуы нәтижесінде қаланың кәріз жүйесінің өткізу қабілеті артып, тұрғындар тарапынан жиі айтылатын сапа мен қолжетімділік мәселесі шешімін табады.
Қазіргі таңда Түркістанда 27 канализациялық насос станциясы (КНС) жұмыс істеп тұр. Олардың алғашқылары 1980 жылы пайдалануға берілсе, кейінгі жылдары жаңа станциялармен толықты. Дегенмен уақыт талабына сай жаңғыртуды қажет ететін желілердің бары рас. Бүгінде қолданыстағы сарқынды су құбырларының жалпы ұзындығы 401,6 шақырымға жетіп отыр, бұл желілерге 17 581 абонент қосылған. Дегенмен қала тұрғындарын орталықтандырылған кәріз жүйесіне қосу көрсеткіші әлі 36,5 пайыз деңгейінде. Бұл көрсеткішті арттыру үшін қазіргі уақытта 13 ірі құрылыс нысанында жұмыс жүргізілуде, олардың жетеуін 2025 жылдың соңына дейін аяқтау жоспарланған.
Кәріз жүйесін жаңғырту тек жерасты инженерлік желілерімен шектелмейді. Құрылыс жұмыстары аяқталған 159 көшеде асфальт төсеу жұмыстары кезең-кезеңімен іске асырылуда. Әкімнің айтуынша, магистралды көшелердегі жөндеу жұмыстары аяқталуға таяу. Ендігі міндет – әр үйге абоненттік қосылымдарды жедел түрде орнатып, асфальттау жұмыстарын дер кезінде аяқтау. Бұл өз кезегінде қала тұрғындарының күнделікті тұрмысын жеңілдетіп, қаланың көркін арттыра түспек.
Түркістан қаласы соңғы жылдары үлкен құрылыс алаңына айналғаны белгілі. Көне тарих пен жаңа заман үндескен бұл шаһар тек сәулетімен ғана емес, инженерлік-инфрақұрылымдық тұрғыдан да озық болуға ұмтылып отыр. Кәріз жүйесін жаңарту бағытында қолға алынған бастамалар – сол ұмтылыстың нақты көрінісі. Қаланың әрбір көшесіне, әрбір үйіне қатысты атқарылып жатқан бұл жұмыстар – Түркістанның келешегі үшін жасалып жатқан берік іргетас. Инфрақұрылымы мығым, тіршілігі тұрақты Түркістан – бүгінгі еңселі еңбектің, ертеңгі жарқын күннің айғағы.
