4 маусым — Қазақстан Республикасының Мемлекеттік рәміздер күні. Бұл күн ел тәуелсіздігінің рухани тірегіндей болған Туымызға, Елтаңбамызға және Әнұранымызға тағзым етіп, ұлттық бірегейлігімізді дәріптейтін ерекше сәт. Осы орайда Қазығұрт ауданының жастары биікке ұмтылған елдің ұрпағы екенін тағы бір мәрте дәлелдеді. Олар аудандық «Жастар ресурстық орталығының» бастамасымен теңіз деңгейінен 1768 метр биікте орналасқан Қазығұрт тауының шыңына көтеріліп, Мемлекеттік Туымызды асқақтата тікті.
Қасиетті Қазығұрт – халқымыздың аңыз-әпсанасына айналған, ұлт жадындағы киелі кеңістіктердің бірі. Адамзаттың жаңғыруының нышанындай болып көкпен таласқан осы таудың биігіне Туды тігу — тек физикалық белсенділік емес, бұл — ұлт рухын шыңға көтерген тарихи қадам.
Бұл шара — жүректегі елге деген сүйіспеншілікті жаңғыртып, жас ұрпақтың бойында отаншылдықты арттыру мақсатында ұйымдастырылған. Сонымен қатар салауатты өмір салтын насихаттау, бірлік пен бауырластықты бекемдеу, мемлекеттік рәміздерге деген шынайы құрметті қалыптастыру шараның басты мұраты болды.
Жастар өз иықтарымен Туды арқалап, биікті бағындыру жолында тек шыңды ғана емес, өз-өзін жеңді, өз ішіндегі азаматтық сезімді оятты. Желбіреген көк байрақ Қазығұрттың ұшар басында желмен тербеліп, Отанға деген адалдықтың, елге деген махаббаттың үніндей асқақтады.
Бұл тек символдық қадам емес. Бұл – болашақ ұрпақтың жүрегінде ұлттық рәміздерге деген құрметтің мәңгі қалатынына дәлел. Жастардың отансүйгіштік рухы мен сергек көзқарасы, табиғатпен етене үндескен бұл бастама рухани жаңғырудың жарқын көрінісі болды.
Жиын соңында жастар Ту алдында тұрып, Қазақстан Республикасының Мемлекеттік Әнұранын шырқап, қасиетті Қазығұрттың биігінде ұлтқа, елге деген адалдықтарын ант етті. Көк Ту төбеде желбіреді, ал жүректерде үміт пен мақтаныш жарқырады.
Мемлекеттік рәміздерге құрмет — бұл ұлтқа, елге, жерге деген адалдықтың өлшемі. Ал оны жүрекпен сезініп, таудың ұшар басында желбірету — бұл шынайы патриотизмнің көрінісі. Қазығұрт жастары — ел болашағының сенімді тірегі екенін осылайша дәлелдеді.
Туың биікте желбіресін, Тәуелсіз Қазақ елі!