Сарыағаш қаласында қазіргі заманғы технологияларды қолдана отырып, сапалы пластик есік пен терезе өндіретін өндірістік цех табысты жұмыс істеп келеді. Жергілікті кәсіпкер Ерғали Омаровтың бастамасымен ашылған бұл өндіріс орны бүгінде тәулігіне 12 тонна өнім шығарып, аймақтың экономикалық әлеуетін арттыруға өзіндік үлесін қосып отыр. Цехта 15 қала тұрғыны тұрақты жұмыспен қамтылған. Бұл – тек кәсіпкерлік табыс қана емес, әлеуметтік жауапкершілік пен еңбек нарығын қолдаудың нақты мысалы.
Аудан әкімі Арман Абдуллаев кәсіпорынға арнайы барып, өндіріс үдерісімен жан-жақты танысып шықты. Жұмыс барысын мұқият бақылаған аймақ басшысы дайын өнім сапасына жоғары баға беріп, жергілікті кәсіпкердің ісіне ризашылығын білдірді. Сонымен қатар, өндіріс ұжымына сәттілік тілеп, өнімнің нарықтағы бәсекеге қабілеттілігін арттыруға байланысты бірқатар нақты ұсыныстарын жеткізді. Атап айтқанда, аймақтық бренд қалыптастырып, логистикалық әлеуетті тиімді пайдалану арқылы сыртқы нарықтарға шығу жолдарын ұсынды.
Өндіріс орнында дайындалатын пластик есік пен терезелер заман талабына сай, беріктігі мен сапасы жағынан жоғары деңгейде. Шикізаттарды өңдеуден бастап, дайын өнім ретінде қалыптастыруға дейінгі барлық технологиялық кезеңдер заманауи жабдықтармен жабдықталған. Мұнда еңбек ететін мамандар да білікті әрі тәжірибелі. Жергілікті кәсіпкердің осындай жоғары деңгейдегі цехты іске қосуы – өңірде шағын және орта бизнестің қанат жайып келе жатқандығының айқын дәлелі.
Бүгінде бұл өнімдер тек Қазақстан аумағында ғана емес, көршілес Тәжікстан мен Қырғызстан елдеріне де экспортталып отыр. Бұл өз кезегінде Сарыағашта өндірілетін тауардың сапасына деген сенімнің артқанын көрсетеді. Аймақтың кәсіпкерлік картасында ерекше орын алатын бұл цехтың қызметі – отандық өндірістің дамып, жаңа нарықтарға жол ашуына мүмкіндік беретін игілікті бастама.
Жалпы, Сарыағаш ауданы кәсіпкерлікті дамытуға, жұмыс орындарын ашуға және отандық өнімдерді халықаралық деңгейге шығаруға бейіл. Осындай өндірістік орындардың көбеюі – өңірдің тұрақты экономикалық өсімі мен халықтың әл-ауқатының артуына бастар жол.
