Жетісай ауданы – еңбек пен үміт тоғысқан, әлеуметтік әділет пен даму жолындағы нақты қадамдар жасалып жатқан мекен. Түркістан облыстық Еңбек мобильділігі орталығының жанынан құрылған Жетісай аудандық Мансап орталығы 2025 жылға арналған ауқымды жұмыспен қамту шараларын кезең-кезеңімен жүйелі түрде жүзеге асырып келеді.
Орталықтың жұмысына жетекшілік ететін, еңбек нарығындағы ахуалды терең білетін, азаматтық жауапкершілігі жоғары Олжас Қаныбеков жуырда тікелей эфир арқылы аудан жұртшылығымен жүздесіп, жыл басынан бері жүзеге асқан жұмыстардың есебін беріп, тұрғындардың сұрақтарына ашық әрі нақты жауап берді. Бұл – билік пен халық арасындағы сенімді диалогқа негізделген озық үлгі.
Жоспарға сәйкес, 2025 жылы аудан аумағында 11 317 азаматты жұмыспен қамту көзделсе, осы мақсаттағы жұмыстардың алғашқы нәтижесі көңіл қуантады. Ағымдағы жылдың 4 айының қорытындысы бойынша 4 572 азамат жұмыспен қамтылып, межеленген жоспардың 40,4 пайызы орындалған. Еңбекке тартылғандардың ішінде 2 837 адам – жұмыссыздар санатынан, 316 адам – нәтижесіз жұмыспен қамтылғандар қатарынан, ал 1 419 азамат – жұмыс іздеуші ретінде тіркелгендер арасынан таңдалып алынған.
Әлеуметтік теңдікті басты қағида ретінде ұстанған орталық әйелдер мен жастарды жұмыспен қамтуға да айрықша мән беріп отыр. 1 455 әйел мен 1 266 жас азаматтың еңбекке тартылуы – осының жарқын көрінісі.
Қоғамнан шет қалмауға тиіс жандардың қатарында мүгедектігі бар азаматтар да бар. Олардың әлеуметке бейімделуі мен еңбекке араласуы мақсатында нақты қадамдар жасалуда. 111 ерекше күтімді қажет ететін азамат жұмысқа орналасқан. Олардың 17-сі – тұрақты жұмыс орындарына, 5-еуі – әлеуметтік жұмыс орындарына, 67-сі – ақылы қоғамдық жұмыстарға тартылса, 1-еуі – «Күміс жас» жобасы арқылы, тағы 1-еуі – жастар тәжірибесі аясында еңбек жолын бастаған. Сонымен қатар, 18 азамат кәсіпкерлік негіздеріне оқуға жіберілді.
Қоғамға бейімделуі күрделі топтардың бірі – пробация есебінде тұрғандар мен бас бостандығынан айыру орындарынан босатылған азаматтар. Бұл бағытта да маңызды шаралар атқарылып, 20 адамға квота бөлініп, оның 5-еуі тұрақты жұмысқа орналастырылды. Бұл – елдегі әлеуметтік жауапкершіліктің нақты нәтижесі.
Ұлттық жобалар аясында 171 азаматты еңбекке тарту көзделсе, бүгінде 31 адам нақты жұмысқа орналасқан. «10 мың тұрғынға – 100 жұмыс орны» жобасы да өз жемісін беріп, 115 адам жұмысқа тартылған. Сонымен қатар, әлеуметтік жұмыс орындарына 705 азамат, жастар практикасына 124 адам, қоғамдық жұмыстарға 1 020 азамат тартылып отыр. Егде жастағы азаматтарға арналған «Күміс жас» жобасы арқылы да 16 адам жұмысқа орналасып, қоғам өміріне белсенді араласуға мүмкіндік алды.
Жылдық жоспар аясында деректер қорында тіркелген 4 966 бос жұмыс орнына 1 243 адам жолданып, тұрақты еңбек етуге кіріскені – нарық пен азамат арасында дұрыс көпір орнағанының айғағы.
Кәсіпкерлікті дамыту да – бүгінгі күннің басты бағыттарының бірі. Осы мақсатта мемлекеттік гранттар арқылы жаңа бизнес-идеяларды іске асыру үшін 139 азаматқа қолдау көрсетілмек. Сонымен қатар, 350 адам онлайн оқу бағдарламасына қатысып, жоспар толық орындалды. «Бастау-Бизнес» жобасы аясында 111 адам кәсіпкерлік негіздерін меңгеріп, дербес кәсібін бастауға мүмкіндік алды.
Бұл мәліметтер – жай ғана статистика емес. Бұл – аудан халқының болашағына бағытталған игі істердің, жүйелі әлеуметтік саясаттың нақты нәтижесі. Жетісай ауданында еңбек етуге құлшынысы бар әр азаматтың мүмкіндігі ескеріліп, қолдауға лайық деп танылған әрбір тұрғынға нақты көмек көрсетілуде.
Осылайша, Түркістан облысының еңбек әлеуетін арттыру жолындағы жұмыстар жаңа сапаға көшіп, әлеуметтік әділеттілік пен тұрғындардың белсенділігін қамтамасыз ететін заманауи тетіктермен толықтырылып келеді. Жетісай – бұл тек еңбек алаңы ғана емес, болашаққа сеніммен қарайтын қоғамның үлгісі.
