Түркі дүниесінің рухани астанасы – Түркістан күн санап жаңарып, жаңғырып келеді. Қасиетті шаһардың әр көшесінде, әр бұрышында өркендеудің, заманауи жаңғырудың іздері байқалады. Ел Президентінің тапсырмасына сәйкес, халыққа жайлы өмір сүру ортасын қалыптастыру бағытында Түркістан облысында кешенді жұмыстар жүйелі түрде жалғасуда. Соның ішінде, көлік инфрақұрылымын жетілдіру – ерекше маңызға ие. Осы орайда облыс әкімі Нұралхан Көшеров шаһардағы бірқатар құрылыс нысандарын аралап, жүріп жатқан жұмыстардың барысымен арнайы танысты. Ол тек құрылыс сапасын ғана емес, жобалардың халыққа берер пайдасын да басты назарға алды. 
Сапар барысында өңір басшысына Қабанбай батыр ескерткіші маңын абаттандыру жобасы да таныстырылды. Қазіргі таңда бұл аумақты заманауи талаптарға сай безендіру қолға алынған. Жоба аясында шахмат алаңы, аяқжолдар, демалысқа арналған орындықтар, урналар мен қоршаулар орнатылады. Сонымен қатар, көгалдандыру жұмыстары да кеңінен жүргізілмек. Бұл тек бір демалыс орны емес, ұрпақ бойына отансүйгіштік пен тарихи сананы сіңіретін рухани кеңістікке айналмақ. Ал қаланың келбеті мен логистикасын жақсартудағы ең ірі жобалардың бірі – теміржол вокзалы маңындағы жолаушылар көпірлерінің құрылысы. Түркістан күн санап туристер легі артып келе жатқан тарихи орталыққа айналып отыр. Мұнда тек ішкі емес, халықаралық бағыттағы жолаушылар да жиі қатынайды. Осыны ескере отырып, тұрғындар мен жолаушылар үшін қауіпсіз әрі ыңғайлы қозғалыс жүйесін құру қажет. Бұл мақсатта Түркістан теміржол вокзалы бойында екі жолаушылар көпірі салынуда. Құрылыс алаңында болған облыс әкімі Нұралхан Көшеров мердігер компания мен техникалық қадағалау өкілдеріне нақты сын-ескертпелер айтып, сапаға салғырт қарамауды ескертті. «Бұл тек бетон мен болаттан құралған нысан емес, адамдардың күнделікті өмір жолын жеңілдететін инфрақұрылым. Сондықтан әр кірпіште – сенім, әр дәнекерде – жауапкершілік жатуы тиіс», – деді өңір басшысы. Жоспарға сәйкес, көпірлердің бірі 117 метрге, екіншісі 46 метрге дейін созылады. Бұл өткелдер жаяу жүргіншілер үшін қауіпсіз және ыңғайлы болмақ. Қазіргі таңда жобаларға қажетті қаржы толық көлемде бөлінген. Құрылысты ағымдағы жылдың соңына дейін аяқтап, пайдалануға беру жоспарланып отыр.Осылайша, Түркістанның дамуы тек сәулетпен емес, адамдардың өмір сүру сапасының артуымен өлшенуде. Теміржол үстінен бой көтеретін бұл көпірлер – тек өткел ғана емес, заманауи Түркістанның символына айналмақ. Өйткені бұл жерде тарих пен болашақ тоғысып жатыр.
Тарих пен болашақ түйіскен мекен: Түркістан вокзалы маңында жаңа көпірлер бой көтеруде
