Түркістан облысында ұлттар мен ұлыстар арасындағы татулықты нығайтуды көздейтін, ел ішіндегі қоғамдық келісімді тереңдетуге арналған игі жобалардың бірі – «Достық керуені» өз жұмысын Келес ауданында жалғастырды. Түркістан облыстық қоғамдық даму басқармасына қарасты «Қоғамдық келісім» мекемесінің бастамасымен жүзеге асырылып жатқан бұл жоба Қазақстан халқы Ассамблеясының бірлік пен бейбітшілікті ту еткен құндылықтарын насихаттауға бағытталған. Аталған кездесуге ҚХА мүшелері, жергілікті ақсақалдар мен аналар кеңесінің өкілдері, түрлі этностардың белсенді жастары мен қоғамдық ұйым мүшелері қатысып, мазмұнды диалог алаңын қалыптастырды.
Жиынның негізгі мақсаты – этносаралық қарым-қатынасты тереңдету, ортақ рухани құндылықтарды дәріптеу және жастарды өз елінің тарихына, тіліне, мәдени мұрасына құрметпен қарауға баулу. Сонымен қатар, жобаның аясында этномәдени бірлестіктердің белсенділері халықпен кездесулер өткізіп, ел арасындағы өзекті мәселелерге ортақ көзқарас қалыптастыруды көздейді. Іс-шара барысында қатысушылар қоғамда ынтымақ пен сыйластықтың маңызы, ұлтаралық татулықты сақтау жолдары, азаматтық жауапкершілік, рухани тұтастық сынды маңызды тақырыптар төңірегінде ашық пікірлерін ортаға салды.
«Достық керуенінің» құрамындағы спикерлер қатарында ҚХА жанындағы Журналистер мен блогерлер клубының төрағасы Ерсұлтан Әмірбек пен кәсіби медиатор Жұлдыз Өтегенова болды. Олар өз сөздерінде қоғамның әр мүшесінің ішкі бірлікке қосар үлесі туралы кеңінен тарқатып, халықты ынтымақ пен мейірімділікке, келісім мен кешірімге бастайтын жолдарды ұсынды. Ерсұлтан Әмірбек еліміздің тыныштығы мен тұрақтылығын сақтау – әрбір азаматтың парызы екенін айтып, медиа кеңістіктегі ұлттар арасындағы түсіністікті нығайтуда журналистиканың рөлі зор екенін ерекше атап өтті. Ал Жұлдыз Өтегенова этносаралық диалог мәдениеті, жанжалсыз қоғам қалыптастыру тетіктері туралы сөз қозғап, медиативті тәсілдер арқылы бейбітшілік орнату жолдарына тоқталды.
Жиын барысында жастар арасында радикалды көзқарастардың алдын алу, жат ағымдардан сақ болу, ұлттық тәрбие мен ортақ құндылықтар негізінде азаматтық ұстаным қалыптастыру секілді мәселелер кеңінен қозғалды. Қатысушылар этносаралық қатынастарды одан әрі нығайтуға қатысты өз ұсыныстарын білдіріп, күн тәртібіндегі мәселелер бойынша нақты пікірлерін жеткізді. Сонымен қатар, ақсақалдар мен аналар кеңесінің мүшелері де жастарды өнегелі жолға бағыттау, дәстүр мен дін аясындағы рухани сабақтастықты сақтау жөнінде тағылымды ойларымен бөлісті.
Кездесу соңында қатысушылар тарапынан қойылған сауалдарға жауап беріліп, жергілікті деңгейде қоғамдық келісімді сақтау және оны одан әрі жетілдіру жолдары талқыланды. «Достық керуені» жобасы – бұл тек сапар емес, әр жүрекке бейбітшілік пен өзара сыйластықтың дәнін себетін рухани көпір. Осындай жобалар арқылы еліміздегі этностар арасындағы татулық пен ынтымақтастық нығая түсіп, ортақ мүдде жолындағы бірлік берік болары сөзсіз.
