Түркістан облысында ауыл шаруашылығы саласын жаңа сапалық деңгейге көтеру жолында үлкен бастама көтеріле бастады. Өңір басшысы Нұралхан Көшеровтың тікелей бастамасымен шетелдік инвесторлар, танымал ғалымдар мен ауыл шаруашылығын зерттеумен айналысатын халықаралық профессорлар бас қосып, маңызды келіссөздер өткізді. Басқосуда айтылған басты ұсыныстардың бірі — Түркістан өңірінде ауыл шаруашылығына қатысты ғылыми орталық пен толыққанды аграрлық университет ашу.
Кездесу барысында өңір басшысы Түркістанның ауыл шаруашылығы саласындағы әлеуетіне ерекше тоқталып, бұл бастаманың өңірдің ғана емес, тұтас елдің дамуы үшін стратегиялық маңызы бар екенін атап өтті. Қазіргі таңда облыс көлемінде алуан түрлі инвестициялық жобалар іске асырылып жатқанын тілге тиек еткен Нұралхан Көшеров ауыл шаруашылығы саласын ғылыммен ұштастырудың уақыты келгенін жеткізді. Әсіресе, су үнемдеу технологияларын енгізу, топырақ құнарын арттыру, өсімдік тұқымдарын жақсарту және осы бағыттағы мамандарды арнайы орталықтарда даярлау — бүгінгі күннің басты талабы.
— Біздің өңір – республика көлемінде ауыл шаруашылығы өнімдерін өндіруде алдыңғы орында. Сондықтан бұл саланы терең зерттейтін, ғылыми тұрғыда дамытатын заманауи зертханалар мен оқу орындары ауадай қажет. Қазірдің өзінде IT саласы бойынша Оңтүстік Кореяның Woosong университетінің филиалы ашылады деп жоспарлануда. Ендігі кезек – аграрлық ғылымға келіп отыр. Бізге тек өз өңірімізге емес, еліміздің өзге де облыстарына қажетті білікті аграр мамандарды даярлайтын, тәжірибе алаңына айналатын жоғары оқу орны керек. Бұл бастамаға біз жан-жақты қолдау көрсетуге әзірміз, – деді облыс әкімі.
Жиынға қатысқан Қытай Халық Республикасының ауыл шаруашылығы саласындағы ең беделді оқу орындарының бірі – Пекин ауыл шаруашылығы университетінің вице-президенті, профессор Ду Тайшэн де Түркістан өңірінің ерекше әлеуетін атап өтті. Ол өзінің сөзінде бұл аймақтың мақта шаруашылығындағы мүмкіндігі, климаты мен су ресурстарын тиімді пайдалану қажеттілігі жайлы айтып, алдағы уақытта Түркістанда су үнемдеу технологияларын енгізу, топырақты жан-жақты зерттеу бойынша бірлескен жобалар жүзеге асатынын жеткізді. Профессор Ду Тайшэн мамандар даярлау мен аграрлық ғылыми-зерттеу жұмыстарына қолдау көрсетуге дайын екендіктерін де атап өтті.
Алайда ғылыми орталық пен университет ашу мәселесі мемлекетаралық деңгейде қаралуы қажет екенін тілге тиек еткен қытайлық маман бұл ұсыныстың маңыздылығын мойындай отырып, тиісті зерделеу жұмыстары басталып кеткенін хабарлады.
Айта кету керек, Түркістан – тарихы терең, топырағы құнарлы өлке ғана емес, бүгінгі таңда экономикалық өсім мен білім саласындағы реформалар арқылы жаңаша тыныс алып келе жатқан өңір. Мұнда ашылуы жоспарланып отырған аграрлық ғылыми орталық пен университет — тек білім ордасы ғана емес, елдің азық-түлік қауіпсіздігін қамтамасыз ететін, жаңа технологияларды жергілікті тәжірибеге енгізетін, ауыл еңбеккерлерінің кәсіби деңгейін арттыратын алтын көпір болмақ.
Жер мен суды аялай отырып, ауыл шаруашылығы ғылымын өркендету жолында Түркістан өңірі жаңа тарихи бетбұрыс алдында тұр. Бұл – болашақтың бақыты үшін бүгінгі жасалған маңызды қадам.
