Қасиетті Түркістан қаласы жыл өткен сайын жаңарып, жайнай түсуде. Ел астанасы Нұр-Сұлтан мен Алматыдан кейінгі аймақтық дамудың жаңа орталығы ретінде қалыптасып келе жатқан шаһардың тұрғын үй саласындағы қарышты қадамдары көңіл қуантады. Биылдың өзінде Түркістанда 3000-нан аса пәтерді пайдалануға беру жоспарланған. Бұл – мыңдаған отбасының көптен күткен арманы орындалып, жаңа қонысқа қол жеткізетінін білдіреді.
Атап айтқанда, биыл 944 пәтерден тұратын 11 көпқабатты тұрғын үйдің құрылысы аяқталып, ел игілігіне берілуі көзделіп отыр. Жыл басынан бері осы жоспардың алғашқы кезеңі сәтті жүзеге асып, 4 үйдің құрылысы тәмамдалып, 348 пәтер иелерін тапты. Бұл – тек бастамасы ғана. Алдағы айларда бұл көрсеткіш еселеп арта түспек.
Түркістан қаласы әкімінің орынбасары Талғат Төлегеновтың айтуынша, қазіргі таңда қала бойынша 17 058 азамат ресми түрде тұрғын үй кезегінде тұр. Олардың қатарында 6 487 әлсіз әлеуметтік топ мүшелері, 5 185 көпбалалы отбасы, 181 ата-анасыз өскен тұл жетім бар. Бұдан бөлек, 5 203 отбасы мемлекет есебінен үй алуға кезекке тіркелсе, апатты деп танылған екі тұрғын үйдің иелері де жаңа баспанаға мұқтаж ретінде тіркеуде тұр.
Көңіл қуантарлық тағы бір жаңалық – 2025 жылдың 24 мамырынан бастап тұрғын үй заңнамасына енгізілген жаңа өзгерістер. Енді санатына қарамастан, соңғы бес жылда атына тұрғын үй тіркелмеген кез келген азамат үй алу үшін кезекке тұру мүмкіндігіне ие болады. Бұл – еліміздегі әлеуметтік әділеттіліктің айқын көрінісі. Сонымен қатар, мемлекеттік тұрғын үй қорынан берілген пәтерлерді жекешелендіру ережесіне де елеулі өзгерістер енгізіліп отыр. Жаңа тәртіп бойынша, бірнеше әлеуметтік санаттағы азаматтар өздері тұрып жатқан пәтерлерді ешқандай төлемсіз, яғни өтеусіз, өз меншіктеріне өткізе алады. Бұл – мемлекет тарапынан халыққа көрсетіліп отырған нақты қолдаудың жарқын көрінісі.
Баспана мәселесін шешудегі тағы бір маңызды қадам – «Отбасы банк» арқылы жүзеге асырылып жатқан несие жүйесі. Түркістан облыстық «Отбасы банк» АҚ филиалы директорының орынбасары Дәурен Мырзатаевтың мәліметінше, 2025 жылы дәл осы банк жүйесі арқылы қосымша 2 082 пәтерді ел игілігіне беру көзделген. Бұл пәтерлерге өтініштер тек Түркістан облысы бойынша үй кезегінде тұрған, банк салымшысы болып табылатын азаматтардан қабылданады.
Қазіргі таңда 1 016 пәтердің әрбір шаршы метрі 180 мың теңгеден, ал 1 066 пәтердің шаршы метрі 220 мың теңгеден бағалануда. Бұл баға саясатындағы икемділік, банк пен мемлекет арасындағы әлеуметтік әріптестіктің нақты жемісі саналады. Осылайша, халықтың қолжетімді баспанамен қамтамасыз етілуі – жүйелі, нақты жоспарға негізделген ұзақмерзімді саясаттың нәтижесі.
Түркістан бүгінде тек рухани астана ғана емес, заманауи мегаполиске айналып келеді. Мұнда тек тарихи жәдігерлер ғана емес, жаңа өмірдің, жаңа бастамалардың, халыққа қызмет ететін нақты жобалардың тамыры тереңге тартып жатыр. Жаңа үйлер – жаңа үміттің, жаңа тыныстың белгісі. Мыңдаған отбасының шырағы жанып, шаңырағы биіктей түспек. Бұл – ел сенімін ақтаған жергілікті биліктің және халықпен бірге алға қадам басқан мемлекеттің табысты бастамаларының нақты жемісі.
