Түркі дүниесінің алтын бесігі, рухани астана Түркістан қаласында халқымыздың мәдени келбетін айқындайтын жаңа әрі сәулетті мәдениет үйі бой көтеруде. Бұл — тек құрылыс нысаны емес, бұл — өнерге, руханиятқа деген шынайы құрметтің белгісі, болашақ ұрпаққа аманат етілетін асыл мұра. Қазіргі таңда нысанның құрылысы қарқынды жүріп жатыр. Заманауи үлгіде жобаланған мәдениет үйінің іргетасы қаланып қана қоймай, елдің рухани кеңістігін кеңейтер маңызды орталық ретінде қалыптасуы көзделуде.
Қала әкімі Әзімбек Пазылбекұлы Түркістан аумағындағы әлеуметтік маңызы зор бірқатар нысандарды аралап, олардың құрылыс барысымен танысты. Солардың ішінде ерекше назар аударылғаны — дәл осы мәдениет үйі. Себебі өнер мен мәдениет — халықтың жан дүниесін тербетіп, ұрпақтың ой-санасын, эстетикалық талғамын қалыптастыратын киелі мекен.
Жоспар бойынша, шілде айында пайдалануға берілуі тиіс бұл мәдениет үйі 500 орындық көрермен залы бар, толықтай заманауи жабдықталған кешен болмақ. Мұнда тек концерттер мен қойылымдар ғана емес, түрлі үйірмелер мен шығармашылық кездесулер, көрмелер мен өнер байқаулары ұйымдастырылатын болады. Бұл — қаланың мәдени тынысын жандандырып, дарынды жастардың талантын ашатын алаңға айналмақ.
Қала басшысы Әзімбек Пазылбекұлы нысан басында сөйлеген сөзінде:
«Мәдениет — ұлттың рухани тірегі. Қаламыздағы әрбір тұрғын өнер мен руханиятқа жақын болуы тиіс. Бұл — біздің басты борышымыз. Осы мақсатта салынып жатқан мәдениет үйі — тек бір ғимарат емес, ол келешек ұрпаққа қалатын өнегелі орда. Түркістанның мәдени әлеуетін көтеріп, жас дарындарды түлететін шығармашылық орталыққа айналарына сенім мол», — деді.
Сондай-ақ, қала әкімі мердігер компанияға құрылыс сапасына ерекше назар аударуды, техникалық талаптар мен қауіпсіздік нормаларын қатаң сақтауды, ең бастысы, нысанды белгіленген мерзімде, яғни осы жылдың шілде айында толық аяқтап, ел игілігіне тапсыруды тапсырды.
Бұл мәдениет үйі — Түркістан қаласының жаңару кезеңіндегі маңызды кезеңнің бір көрінісі. Қасиетті қалада жаңадан бой көтеріп жатқан білім, мәдениет, спорт нысандары — ұрпақ болашағына бағытталған берік іргетас. Солардың арасында шығармашылықтың шырағын жағатын, ұлттық өнер мен әлемдік мәдениетті тоғыстыратын осындай заманауи мәдениет үйлері — нағыз рухани жаңғырудың дәнекері.
Халқы өнерді ұлықтаған, мәдениетке мән берген ел ешқашан рухани жұтамайды. Түркістан төрінде бой көтеріп жатқан бұл жаңа мәдениет үйі — соның айқын дәлелі. Жаңа орда өнердің өрісін кеңейтіп, ұлт руханиятының ұлы керуенін жаңа биіктерге бастайтыны сөзсіз. 
