Сауран серпіні: Ауыл шаруашылығы мен өнеркәсіп өркендеп, жаңа жұмыс орындары ашылады

Түркістан облысына қарасты Сауран ауданында биыл ауыл шаруашылығы мен өңдеуші өнеркәсіп салаларында тың серпін байқалады. Аудан аумағында құны миллиардтаған теңгені құрайтын инвестициялық жобалар кезең-кезеңімен жүзеге асырылып, ауыл әлеуеті артып келеді. Бұл туралы аудан әкімі Мақсат Таңғатаров БАҚ өкілдерімен өткен брифинг барысында мәлімдеді. 2025 жылдың алғашқы бес айында аудан экономикасына 6,8 млрд теңгенің ауыл шаруашылығы өнімі өндірілген. Ал жыл соңына дейін бұл көрсеткішті 102 млрд теңгеге жеткізу көзделіп отыр. Бұл межеге жету үшін ауданда 13 ірі инвестициялық жобаның жүзеге асырылуы жоспарланған. Жобалардың жалпы құны – 16,4 млрд теңге. Ауқымды бастамалардың бірі – Шаға ауылдық округінде орналасатын 280 мың басқа арналған құс фермасы. «Eco-Chiken» жауапкершілігі шектеулі серіктестігі қолға алған бұл жоба 2,5 млрд теңгеге бағаланып отыр. Ет бағытында жұмыс істейтін бұл заманауи өндіріс орны тек Түркістан облысының ғана емес, бүкіл Қазақстанның нарығын сапалы құс етімен қамтамасыз етуді көздейді. Тіпті өнімді шетелге экспорттау әлеуеті де қарастырылған. Сонымен қатар, «Ақ Сауран» ЖШС қолға алған тағы бір ірі жоба – 700 гектар жерге жаңбырлатып суару қондырғысын орнату. Құны 1,5 млрд теңгені құрайтын бұл бастама агросаладағы еңбек өнімділігін арттыруға жол ашады. Аудан басшысы бұдан бөлек, бірнеше ірі мал бордақылау алаңдары мен жылыжай кешендері де іске қосылатынын атап өтті. Бұл жобалар аймақтың азық-түлік қауіпсіздігін қамтамасыз етуге және жұмыс орындарын көбейтуге едәуір үлес қосады.

2030 жылға дейін – үлкен мақсаттар

Ауданның ұзақмерзімді даму жоспары да дайын. 2030 жылға дейін Сауран ауданында жалпы құны 209,3 млрд теңге болатын 254 инвестициялық жоба жүзеге асырылады деп күтілуде. Бұл жобалар арқылы 4 162 жаңа жұмыс орны ашылады. Ал 2025 жылдың соңына дейін медициналық жиһаз, тұрмыстық химия, құрылыс материалдары, тамақ өнімдері және басқа да тауарларды өндіретін 30 жаңа өндірістік нысан пайдалануға беріледі. Бұл жобаларға тартылатын инвестиция көлемі – 100 млрд теңге. 1 500 азамат тұрақты жұмыспен қамтылмақ.Туризм – тарихи мұраның ізімен. Сауран – тек өндіріс пен ауыл шаруашылығына ғана емес, туризм саласына да ерекше мән беріп отырған өңір. Аудан аумағында қазіргі таңда 54 тарихи нысан орналасқан. Оның үшеуі – республикалық маңызға ие. 2023 жылдың қорытындысы бойынша өңірге келген туристер саны 100 мың адамға жуықтаған. Бұл – Сауранның туризм әлеуеті жоғары екенін көрсетеді. Биыл жалпы құны 5,3 млрд теңге болатын 9 туристік жоба жүзеге асады. Жобалар нәтижесінде 164 жаңа жұмыс орны ашылады. Сонымен қатар, Үшқайық ауылдық округінде орналасқан минералды су көздерін тиімді пайдалану мақсатында 20 гектар аумаққа емдік-сауықтыру кешені салу жоспарлануда. Бұл бағытта 5 млрд теңге инвестиция тартылады, 14 жоба іске асырылмақ. Инфрақұрылым – тіршіліктің тамыры. Аудандағы инфрақұрылым саласында да оң өзгерістер байқалады. Бүгінгі таңда 33 елді мекеннің 32-сі таза ауыз сумен қамтылған. Биыл Ескі Иқан, Жүйнек, Қазақстанның 30 жылдығы және Егізқара ауылдарындағы су жүйелері толық реттеліп, тәулігіне 24 сағат үздіксіз су беріледі. Электрмен қамту саласында да бірқатар жұмыстар атқарылды. 2024 жылы жергілікті бюджет есебінен 56 трансформатор ауыстырылып, «Оңтүстік Жарық Транзит» компаниясы тарапынан 17 шақырым электр желісі жаңартылып, 4 жаңа трансформатор орнатылған. Жыл соңына дейін тағы 17 трансформатор мен 13 шақырым желі жаңғыртылады. Табиғи газбен қамту көрсеткіші бүгінде 43,3% болса, жыл соңына дейін қосымша 1 790 абонент көгілдір отынға қосылып, бұл көрсеткіш 45,6%-ға жетеді.Сауран — тек тарих қойнауынан сыр шертетін өңір ғана емес, болашаққа қадам басқан, жаңғыру мен дамуды қатар алып жүрген аймақ. Ауыл шаруашылығы, туризм, өнеркәсіп, инфрақұрылым – барлығы да жүйелі жоспармен өркендеп келеді.