Тарихы мен тағдыры тоғысқан екі елдің – қазақ пен өзбектің арасындағы рухани сабақтастық пен мәдени үндестіктің тамыры тереңде жатыр. Сол бір текті үндестіктің тағы бір айқын көрінісі – жақында ғана Өзбекстанның Ташкент облысына қарасты Шыназ ауданындағы Ешанабад ауылында өткен әсерлі өнер кеші болды. Бұл кеш – тек сахналық бағдарлама емес, өнердің алтын арқауымен өрілген бауырластықтың, достықтың, бірлік пен рухтың жарқын үлгісі еді. Өзінің мағынасы мен мазмұны жағынан жүректі тербеген бұл мәдени шараны Келес аудандық мәдениет үйінің өнерпаздары арнайы гастрольдік сапармен барып, «Туған жерге тағзым» атты концерттік бағдарламасы аясында ұсынды. Әшірәлі Кенжеев атындағы мәдениет үйінің әрбір өнерпазы сол кеште сахна төрінде қазақ халқының бай мұрасы мен жүрек тербетер өнерін паш етіп, Өзбекстан жеріндегі қандастарымызға сағыныш сыйлап қана қоймай, қос халықтың арасын одан әрі жақындата түсті. Концерттің шымылдығы ата-баба рухына тағзым етіп, ұлттың рухын көтеретін, жүрекке салмақ салар сырлы туындылармен түріліп, бірден көрермен көңілін баурап алды. Әзіл мен сатира, дәстүрлі өнер мен заманауи жанр, музыка мен сахналық көріністер – барлығы да тереңнен толғап, әр жүрекке жол тапты. Бұл кештің ерекшелігі – өнердің әсемдігі мен мазмұн тереңдігінде ғана емес, сонымен бірге өнерпаздардың сахнада жанын салып өнер көрсетуінде болды. Әрбір ән, әрбір көрініс, әрбір қимылдың өзінде жүрек жылуы, туған жерге деген сағыныш, елге деген сүйіспеншілік, ұлттық мәдениетке деген мақтаныш сезілді. Әсіресе сахнадан орын алған қос халықтың ортақ рухани қазыналарын дәріптеген композициялар – тіл мен ділдің, өнер мен тағдырдың үндестігін айқын көрсетіп, көрермендер жүрегінен ерекше орын алды. Бұл сапардың басты маңызы – өнер арқылы ел мен елдің арасындағы көпірді одан әрі нығайту, рух пен сана үндестігін тереңдете түсу болатын. Және бұл мақсат толық орындалды. Қазақтың әні Өзбекстан аспанында әуелеп, сахнадан төгілген күй қос халықтың ортақ мұрасындай естіліп, жүректерді тербеді. Бұл – өнердің құдіреті, бұл – мәдениеттің мәңгілік дәнекерлігі. Концерт соңында Ешанабад ауылының тұрғындары қонақтарға ерекше алғысын білдіріп, Келес ауданынан келген өнер ұжымына шынайы ризашылықтарын жеткізді. Олардың әрбір қошеметінде тек көрермен ықыласы емес, тұтас халықтың алғысы жатқандай еді. Өнер – ұлттың үні, рухтың тілі, ал осы кеш соның дәлелі болды. «Туған жерге тағзым» деген атау алған бұл концерт – туған топыраққа деген махаббатты, ұлттық өнерге деген адалдықты, әрі ағайынды елдердің достығын терең сезіндірген ерекше мәдени оқиғаға айналды. Осындай сапарлар – тек сахналық бағдарлама ғана емес, рухты тірілтетін, бауырласты бекемдейтін, ұрпақты ұлық өнермен тәрбиелейтін рухани бастамалар. Келестік өнерпаздардың бұл сапары – мәдениет арқылы ел мен елді жақындатқан шынайы достықтың, өнермен өрілген ағайындықтың ғажап үлгісі болып есте қалды. 
Рухани үндестік – өнерде
