Қазақ даласы ежелден-ақ түрлі ұлт пен ұлыстың құтты мекені, киелі топырағы – бейбітшілік пен келісімнің бесігі саналған. Сол дәстүрдің алтын арқауы үзілмей, бүгінгі ұрпақтың бойына ұлттар мен ұлыстардың татулығын дарытып келе жатқан қасиетті мекеннің бірі – Түркістан өңірі. Түркі әлемінің рухани жүрегі саналатын осы өлке жуырда тағы бір тағылымды, мазмұнды оқиғаның куәсі болды. Бейбіт өмірді, ел ішіндегі жарасымды тіршілікті, көпэтносты қоғамның рухани үйлесімін арқау еткен ерекше форматтағы көркем өнер бәйгесі – «Түркістан – бірліктің бастауы» атты фотобайқау салтанатты түрде ұйымдастырылды. Бұл шара – бейбітшілік пен достықты тек сөзбен емес, өнер тілімен жеткізуге арналған ұлағатты қадам болды.
«Достық үйі» сынды символдық мәні зор кеңістікте өткен байқау биыл Қазақстан халқы Ассамблеясының 30 жылдық мерейтойына арналды. Іс-шараны Түркістан облыстық қоғамдық даму басқармасы жанындағы «Қоғамдық келісім» мекемесі жоғары деңгейде жүзеге асырып, өңірдің рухани өміріне тың серпін әкелді. Жүздеген адамның басын қосқан бұл рухани жиын – өнер арқылы үндескен жүректердің бейбіт өмірге деген ізгі үндеуі, татулықты ту еткен тағылымды тұғыр іспетті әсер қалдырды.
Фотобайқауға қатысушылардың арасында Түркістан өңірінің белсенді жастары, этномәдени бірлестіктердің өкілдері, облыстық ҚХА жанындағы құрылым мүшелерімен қатар, Алматы қаласынан арнайы келген кәсіби фотографтар да болды. Бұл – байқаудың өңіраралық маңызға ие болғанын көрсетеді. Барлығы жиырмаға жуық үміткер өз туындыларын ұсынды. Көптеген қатысушылар фотосуреттерін қашықтан жолдап, цифрлық технологияның мүмкіндіктерін тиімді пайдаланды. Жолданған әрбір жұмыс – бейбіт өмірдің көркем бейнесі, ұлттар достығының үнсіз жаршысы, еліміздің тыныштықтағы тынысын шебер жеткізген өнер туындысы болды.
Фотолар арқылы өмір шындығы терең бейнеленді. Түрлі ұлт өкілдерінің өзара сыйластығы, ортақ мұрат жолындағы татулығы, бір шаңырақ астында тіршілік кешіп жатқан біртұтас ұлттың бейбіт болмысы фотообъектив арқылы оқырманның жүрегіне жол тапты. Көпұлтты қоғамның жарасымды келбеті, мәдени әралуандылықтағы бірлік, тіршіліктің татымды сәттері көркем композициямен өріліп, әрбір суретте терең ой, астарлы мағына жатты.
Байқаудың ашылу рәсімінде сөз сөйлеген Түркістан облыстық қоғамдық даму басқармасы басшысының орынбасары Нұрсұлтан Сейтжанов қатысушыларға алғысын білдіріп, осындай бастамалардың қоғамдағы бейбітшілік пен татулықты бекемдеудегі мән-маңызына тоқталды. Ол фотосурет өнерінің адам жүрегін тербететін, сананы сәулелендіретін күшке ие екенін, ал кадрға түсірілген әрбір сәттің ұлттың рухани құндылығын жаңғыртуға себеп болатынын ерекше атап өтті.
Байқаудың қорытындысы бойынша қазылар алқасы фотоларды мазмұны, көркемдік сапасы және идеялық тереңдігі бойынша бағалап, нәтижесінде түркі рухын, елдің бірлігі мен рухани үндестігін ерекше шеберлікпен жеткізген Самат Мырзалиевтің жұмысы үздік деп танылып, 1-орынды жеңіп алды. Одан кейінгі орындарды Мақсат Шағырбай мен Нуриддин Искаков өзара бөлісті. Олар ұлттар арасындағы татулықты кадр тілімен шебер жеткізе білгені үшін арнайы дипломдармен, алғыс хаттармен және бағалы сыйлықтармен марапатталды. Сонымен қатар, белсене атсалысқан өзге де қатысушылар назардан тыс қалмай, ынталандыру сыйлықтарына ие болды. Бұл – шығармашылыққа көрсетілген құрмет, ізденіс пен еңбекке берілген жоғары баға болды.
Фотобайқаудан соң ұйымдастырылған концерттік бағдарлама шараның маңызын еселей түсті. Жергілікті өнерпаздар әсем ән мен сырлы күй арқылы көрермендердің көңіл төрінен орын алып, рухани кештің шырайын аша түсті. Тыңдармандар өнер арқылы татулықты, ән арқылы достықты, күй арқылы келісімді жүрекпен сезінді. Бұл – бейбіт күннің маңызын еске салып, елдегі ұлттар арасындағы жарасымды өмірдің қадірін ұғындырған, болашаққа деген сенімді арттырған ерекше кеш болды.
Осылайша Түркістан төрінде өткен бұл мазмұнды фотобайқау – бейбіт өмірдің қадірін ұғындырған, келісім мен татулықты көркем тілмен дәріптеген, ел мен жерге деген махаббатты өнер арқылы насихаттаған тағылымды іс-шара болды. Кадрға түскен әрбір бейне – ұлттар арасындағы достықтың айнасы, татулықтың шежіресі, жасампаздықтың белгісі. Өйткені бейбіт өмір – бәрінен қымбат, ал сол бейбіт тіршілікті көзбен көріп, жүрекпен сезініп, объектив арқылы ұрпаққа жеткізу – шынайы өнердің, әрі нағыз азаматтықтың белгісі. Түркістанда өткен бұл байқау – дәл осы рухты ұлықтаған, татулықты ту еткен өнер мерекесі болды.
