Түркістан – түркі әлемінің рухани астанасы ғана емес, бүгінде ұлттар мен ұлыстардың татулығын ту еткен, бейбіт өмірді баянды етуде үлгі көрсетіп келе жатқан өңірлердің бірі. Жуырда осы қасиетті қалада бейбітшілік пен достықты дәріптеген мазмұнды іс-шара – «Түркістан – бірліктің бастауы» атты фотобайқау өтті. Іс-шара ел бірлігі мен қоғамдық келісімді насихаттау, сондай-ақ елдегі этносаралық татулықты көркем өнер тілімен бейнелеу мақсатында ұйымдастырылды.
«Достық үйінің» төрінде өткен байқау Қазақстан халқы Ассамблеясының 30 жылдығына арналды. Шараны Түркістан облыстық қоғамдық даму басқармасы жанындағы «Қоғамдық келісім» мекемесі қолдап, үлкен деңгейде өткізілуіне ықпал етті. Байқауға облыстық ҚХА жанындағы құрылымдардың мүшелері, этномәдени бірлестіктердің жетекшілері мен «Ассамблея жастары» республикалық қозғалысының өңірлік белсенділері қатысты.
Бұл жолы фотоөнер арқылы татулықты таныту мақсатында Түркістан өңірінен бөлек, алыс Алматы қаласынан да үміткерлер қатысты. Жалпы саны 20-ға жуық фотограф өз жұмыстарын ұсынды. Кейбір қатысушылар фотосуреттерін онлайн түрде жолдап, байқауға қашықтан қатысу мүмкіндігін де тиімді пайдаланды. Туындылардың барлығы достық пен келісім, көпэтносты еліміздің бірлігі мен бейбіт болмысын сипаттауға бағытталған. Фотолар объектив арқылы бейнеленген өмір шындығын, түрлі ұлт өкілдерінің ортақ мүдде төңірегінде тоғысып жатқан рухани үндестігін дәл жеткізе білді.
Байқаудың ашылу салтанатында Түркістан облыстық қоғамдық даму басқармасы басшысының орынбасары Нұрсұлтан Сейтжанов сөз алып, қатысушыларға жылы лебізін білдіріп, осындай игі шаралардың қоғамда бейбітшілік пен ынтымақты нығайтудағы рөліне тоқталды. Ол фотосурет өнерінің ел мен жерді сүюге, Отанның әр сәтін қадірлеуге баулитын ерекше құрал екенін атап өтті.
Байқау қорытындысында қазылар алқасының шешімімен түркі дүниесінің рухын, елдің бірлігі мен достығын ерекше сезіммен жеткізе білген Самат Мырзалиевтің жұмысы жеңімпаз деп танылып, 1-орынды иеленді. 2-орынға Мақсат Шағырбай лайық деп танылса, 3-орын Нуриддин Искаковқа бұйырды. Жеңімпаздар мен жүлдегерлерге арнайы дипломдар, алғыс хаттар мен бағалы сыйлықтар табысталды. Сонымен қатар, белсене қатысып, өзінің шығармашылығы арқылы қоғамға үлес қосқан өзге қатысушылар да назардан тыс қалмай, лайықты марапаттарға ие болды.
Шара соңында ел бірлігін ұлықтаған фотобайқау жергілікті өнерпаздардың әсем әні мен күмбірлі күйіне ұласқан мерекелік концертпен жалғасын тапты. Көрермендер рухтанып, жасампаздық пен жарасымды өмірді тереңнен сезініп, тарқасты.
Осылайша Түркістан төрінде өткен бұл ерекше байқау – бейбіт өмірдің құндылығын бейнелеген, бірліктің қадірін ұғындырған, өнер арқылы үндескен жүректердің ортақ мерекесі болды.
