Халықтың өмір сүру сапасын арттыру – Ел Президенті Қасым-Жомарт Тоқаев жүргізіп отырған әлеуметтік бағдарланған реформалардың негізгі өзегі. Осы бағытта Түркістан облысының Келес ауданында тұрғындарды табиғи газбен қамтамасыз ету мәселесі кезең-кезеңімен шешімін тауып, нақты нәтижелерге қол жеткізіліп келеді. Бүгінде ауданның басым бөлігі көгілдір отынға қосылып, әлеуметтік инфрақұрылымды дамытудағы маңызды қадамдардың бірі сәтті жүзеге асырылуда.
Ресми деректерге сәйкес, Келес ауданында барлығы 83 елді мекен болса, қазіргі таңда оның 59-ы табиғи газ жүйесіне қосылған. Бұл – жалпы көрсеткіштің 71,1 пайызын құрайды. Бұл тек статистикалық дерек емес, бұл – мыңдаған отбасының өмір сапасы артып, тұрмыстық қолайлылыққа қол жеткізгенін білдіретін маңызды нәтиже.
Қалған 24 елді мекенде де газдандыру жұмыстары жүйелі жоспарға сәйкес жалғасуда. Қазіргі уақытта төрт елді мекенде – атап айтқанда, Ұшқын ауылдық округіндегі Достық, Қоралас, Қошқарата округіндегі Ұшқын және Бірлік округіндегі Бірлік елді мекендерінде құрылыс-монтаждау жұмыстары қарқынды жүргізілуде. Бұл жұмыстар толық аяқталған жағдайда, газға қосылған ауылдардың қатары тағы да толыға түспек.
Сонымен қатар тоғыз елді мекен бойынша магистральды газ құбырын тартуға қажетті жобалық-сметалық құжаттамалар әзірленіп, тиісті мемлекеттік сараптамадан оң қорытынды алынған. Бұл ауылдарға – Бірлік ауылдық округіндегі Жанатіршілік, Қосөткел, Үшағаш, Ошақты округіндегі Бақшысай, Ынталы, Саттаров, Қаратал, Атақоныс және Жиделі елді мекендері жатады. Ендігі кезекте бұл жобаларды қаржыландыру мен іске асыру мәселесі кезең-кезеңімен қолға алынбақ.
Аудан орталығы Абай ауылында табиғи газбен қамту көрсеткіші бүгінде 100 пайызға жетіп отыр. Бұл – аудан әкімдігі мен облыстық тиісті басқармалардың үйлесімді әрекетінің, мемлекеттік бағдарламалардың табысты жүзеге асып жатқандығының жарқын көрінісі. Дегенмен, инфрақұрылым дамуы тоқтамайтыны белгілі. Қазіргі таңда Абай ауылындағы кейбір көшелер мен тұрғын үйлерде пайдаланылып отырған жіңішке диаметрлі газ құбырларын жаңғырту қажеттілігі туындап отыр. Осыған байланысты жаңа техникалық жобалар әзірлеу бағытында сәулет-жоспарлау тапсырмалары дайындалып, тиісті рәсімдеу жұмыстары жүргізілуде.
Газдандыру – жай ғана әлеуметтік жеңілдік емес, бұл – экономикалық даму, экологиялық тазалық және тұрғындардың тұрмыс сапасына тікелей әсер ететін стратегиялық бағыт. Келес ауданындағы атқарылып жатқан жүйелі жұмыстар – Мемлекет басшысының «Ауыл – ел бесігі», «Халық үніне құлақ асатын мемлекет» секілді бастамаларының өңірлік деңгейде нақты іске асып жатқанының дәлелі.
Бүгінгі 71 пайыздық қамту – аралық нәтиже ғана. Алдағы жылдары бұл көрсеткішті 100 пайызға жеткізу көзделуде. Бұл мақсат – тек әкімдікке жүктелген міндет емес, бұл – мемлекет пен халық арасындағы сенімді серіктестіктің үлгісі. Келестегі әрбір отбасына қолжетімді, қауіпсіз әрі үнемді көгілдір отынды жеткізу – халық игілігі үшін жасалып жатқан шынайы қамқорлықтың көрінісі.
