Түркістан облысының күнгейінде, Қазығұрт тауының баурайында орналасқан өндіріс ошағы – «Қазығұрт» индустриалды аймағы өңір экономикасының қуатты тетігіне айналып келеді. Бұл аймақта бүгінде жалпы құны 4,9 миллиард теңгені құрайтын 8 ауқымды жоба жүзеге асырылуда. Жобалардың басты мақсаты – экономиканы әртараптандыру, жаңа өндіріс көздерін ашу, және ең бастысы – жергілікті халықты тұрақты жұмыспен қамту. Жоспарға сәйкес, 249 жаңа жұмыс орны ашылады деп күтілуде. 
Қазіргі таңда бұл индустриалды аймақта құны 2,2 миллиард теңгеге бағаланған 4 жоба сәтті іске қосылып, 123 адам еңбекпен қамтылған. Ал қалған жобалар бойынша құрылыс қарқыны үдемелі жүргізілуде. Түркістан облысы әкімінің орынбасары Талғат Қозбеков жұмыс сапарымен Қазығұрт ауданына арнайы келіп, өндіріс аймағын аралап, жоба барысымен танысты. Ол жауапты тұлғаларға инвестор тарту ісін үдете түсуді тапсырып, «өндірісті өрге сүйрейтін нақты қадамдар қажет» екенін айтты. Аталған жобалардың ішінде ерекше атап өтерлік жоба – «Билол» жеке кәсіпкерлігінің болат шарлар шығаратын зауыты. Қазіргі таңда 3 гектар аумақта орналасқан өндіріс орнының құрылысы 80 пайызға аяқталған. Жылдық қуаттылығы 5000-6000 тонна болатын зауытқа қажетті құрал-жабдықтар жеткізіліп, орнатылу үстінде. Сонымен қатар биылғы мамыр айында тағы екі өндіріс жобасының құрылысы басталды. Олардың бірі – «TIMUR.LES» ЖШС-і. Бұл кәсіпорын жиһаз, жұмсақ полиуретанды көбік пен бағдарланған бөлшектер тақтасын шығаруға бағытталған. Жоспар бойынша зауыт жылына 10 мың дана жиһаз өндіретін болады. Екінші жоба – «AGRO irrigation» ЖШС-нің су үнемдеуге арналған полиэтилен құбырларын шығаратын өндірісі. Инвестиция көлемі 1,2 миллиард теңгеге жететін бұл кәсіпорынның жобалық қуаттылығы – 10 000 тонна. Қазіргі уақытта кәсіпорындарға қажетті жер телімдері рәсімделіп, құрылыс жұмыстары басталып кеткен. Сондай-ақ, ауыл шаруашылығында су тапшылығы мәселесін шешуге атсалысып отырған тағы бір жоба – «Сапа 2002» ЖШС-нің 150 гектар жерге жаңбырлатып суару жүйесін енгізу жұмыстары. Бұл технология су ресурстарын үнемдеп, өнімділікті арттыруға жол ашады. «Қазығұрт» индустриалды аймағы бұған дейін де өз тиімділігін дәлелдеген. Мәселен, «Көрік ШҚ» ЖШС 2018 жылдың қазан айынан бері алкогольсіз табиғи шырындар өндірумен айналысып келеді. Жылдық қуаттылығы 1000 тонна болатын бұл кәсіпорын өңірлік нарықты сапалы өніммен қамтып отыр. Ал 2019 жылдың қарашасында іске қосылған «CG Foods Central Asia» ЖШС тез дайындалатын тағамдарды өндіруде көш бастады. Бұл зауыт жылына 1100 тонна өнім шығарады және өнімдерін Қазақстанмен қатар Ресей мен Орталық Азия елдеріне экспорттайды. Мұнда 100 адам еңбек етуде. Индустриалды аймақтың тағы бір мақтанышы – «Асыл» ЖШС-нің автоматтандырылған ауыз су жүйесі мен капсула өндірісі. Бұл жоба да өңірдегі инновациялық бастамаларға тың серпін беріп отыр. Сонымен қатар, «Сабит» шаруа қожалығы «Ағанай» су қоймасына 200 мың шабақ жіберіп, балық шаруашылығын дамытуда. Бұл бастама өңірде экологиялық тепе-теңдік пен азық-түлік қауіпсіздігін қамтамасыз етуге бағытталған. Осылайша, Түркістан облысындағы «Қазығұрт» индустриалды аймағы өңірлік өндірісті жандандыруда жетекші рөл атқарып келеді. Мемлекеттің қолдауы мен жеке сектордың белсенділігі арқасында бұл аймақ болашақта Қазақстанның өнеркәсіптік әлеуетін арттыратын ірі кластерлердің біріне айналары сөзсіз.
Қазығұрттағы өндіріс өрісі: Түркістанда индустрия жаңа белеске көтерілуде
