Бүгін бау-бақшаға бөленген, берекелі өңір – Сарыағаш ауданында бейбітшілік пен бірлікке бағытталған мазмұнды әрі тағылымды шара өтті. Түркістан облыстық қоғамдық даму басқармасы «Қоғамдық келісім» КММ-нің ұйымдастыруымен Қазақстан халқы Ассамблеясының «Достық керуені» жобасы аясында аудан жастарына арналған ақпараттық-насихаттық кездесу өтті.
Бұл керуен – жәй ғана іс-шаралар шеруі емес, ол – ұлттық бірлік пен татулықты темірқазық еткен ұлы ұстанымның жаршысы. Әр ауданға аялдаған сайын халықпен, әсіресе жастармен етене жүздесіп, ел болашағы – бейбіт өмірдің негізі туралы кеңінен сөз қозғайтын алаңға айналып отыр.
«Достық керуенінің» түпкі мақсаты – келісімді күшейту, татулықты тереңдету
«Достық керуені» жобасы Қазақстан халқы Ассамблеясының бастамасымен жүзеге асып келе жатқан бірегей жоба. Оның басты мақсаты – өңірлік этномәдени бірлестіктер мен Ассамблея өкілдерінің елмен тікелей жүздесуін қамтамасыз етіп, этносаралық татулықты сақтау мен нығайту бағытында ағартушылық жұмыстар жүргізу. Сондай-ақ жастар арасында өзара түсіністік пен ынтымақтастықты арттырып, түрлі идеологиялық тәуекелдердің алдын алу көзделеді.
Сарыағаштағы басқосу – жастар үнін тыңдаған диалог алаңы
Шараға Ассамблея жастары, Жастар ресурстық орталығының өкілдері, аудандық ішкі саясат бөлімінің мамандары және әртүрлі этнос өкілдерінен шыққан жастар қатысты. Еркін форматтағы бұл кездесу – пікір алмасуға, тәжірибе бөлісуге және ортақ құндылықтарды тереңірек ұғынуға мүмкіндік берген мазмұнды жиын болды.
Жиын барысында сөз алған Түркістан облысы қоғамдық даму басқармасы «Қоғамдық келісім» КММ басшысының орынбасары Ерназар Баетов жастарды бейбітшілік пен келісімнің маңызын терең түсінуге шақырып, елдегі тұрақтылықтың негізі – татулық екенін атап өтті.
«Бірлік пен бейбіт өмір – жай сөз емес, бұл әрқайсымыздың жауапкершілігімізбен тікелей байланысты құндылық. Әр ұлттың өкілі бір үйдің баласындай бола білсе – еліміз мәңгілік елге айналады», – деді ол өзінің ой-толғамында.
Жастар – бейбіт болашақтың кепілі
Кездесу барысында жастар да белсенділік танытып, өз ойларын, ұсыныстарын, пікірлерін ортаға салды. Олар ұлттық тәрбиенің негізі, діни сауаттылық, ақпараттық қауіпсіздік, жастардың бос уақытын тиімді ұйымдастыру, мәдени іс-шараларды кеңейту сынды мәселелерге қатысты нақты ұсыныстар білдірді.
Жат ағымдардан сақтану, рухани тұрақтылықты сақтау, ұлттық бірегейлікті дамыту бағыттарындағы сұрақтар мен пікірлерге спикерлер жан-жақты жауап беріп, жастарға қажетті кеңестер ұсынды.
Ұлттар арасындағы татулық – халықтар арасындағы достық
Этносаралық келісім – бұл мемлекеттің ішкі тұрақтылығы мен дамуының өзегі. Сондықтан кездесуде осы тақырыпқа да ерекше көңіл бөлінді. Әсіресе, этнос жастары арасындағы мәдени байланысты нығайту, ортақ тарихи құндылықтарды ұлықтау және әр ұлттың ерекшелігін құрметтей отырып, ортақ мүддеге қызмет ету туралы пікірлер айтылды.
«Біздің барлығымыздың ортақ үйіміз – Қазақстан. Біз осы үйдің берік шаңырағын бірге ұстап тұруымыз керек. Ол үшін бір-бірімізді тыңдай білу, түсіне білу – ең үлкен міндет», – деп атап өтті жиынға қатысқан жастардың бірі.
Қорытынды ой – керуеннің жүгі ауыр, жолы жарқын
Сарыағаш ауданындағы бұл кездесу – «Достық керуені» жобасының ел ішіндегі өміршеңдігін тағы бір мәрте айқындады. Ашық диалог, шынайы пікір алмасу, ұлттық бірлік пен рухани келісім туралы терең әңгімелер – осы жиынның басты мазмұнына айналды.
Кездесу – тек насихаттық сипатта емес, жастардың елдік мәселелерге араласуына, пікір айтуына мүмкіндік берген нақты алаң болды. Мұндай жобалар арқылы жастардың рухани иммунитеті күшейіп, елге деген сүйіспеншілігі арта түсетіні анық.
P.S.
«Достық керуені» алдағы уақытта да Түркістан облысының бірнеше аудандарын аралап, бейбітшілік пен татулық үнін шалғай ауылдарға да жеткізбек. Өйткені бүгінгі бірлік – ертеңгі кемел елдің кепілі.
