Білім беру, спорт және тұрғын үй инфрақұрылымын дамыту – бүгінгі мемлекеттік саясаттың негізгі басымдықтарының бірі. Осы бағытта Түркістан облысының Арыс қаласы соңғы жылдары тың серпінмен дамып, әлеуметтік инфрақұрылымды жаңғыртуда оң нәтижелерге қол жеткізуде. Ел Президенті Қасым-Жомарт Тоқаевтың тапсырмасы аясында өңірлерде жүзеге асып жатқан ұлттық жобалар мен бағдарламалар шеңберінде Арыста бірнеше маңызды нысан халық игілігіне берілмек.
Қазіргі таңда қалада «Жайлы мектеп» ұлттық жобасы аясында 600 орындық жаңа білім ордасының құрылысы қарқынды жүргізілуде. Заманауи талаптарға толық сай келетін бұл нысан жаңа оқу жылында оқушылар үшін есігін айқара ашпақ. Мектептің ішкі құрылымы оқушылардың жан-жақты дамуына арналған. Екі кең спорт залы, заманауи акт залы, пәндік кабинеттер, зертханалар, шеберханалар, кітапхана мен коворкинг-аймақтар, сондай-ақ мәжіліс залдары мен футбол алаңы – барлығы бір ортада үйлесім тапқан. Қазіргі таңда құрылыс жұмыстарының 80 пайызы аяқталған.
Мектептің ашылуы – сапалы білім беру ортасын қалыптастыруға бағытталған нақты мемлекеттік қолдаудың нәтижесі. Бұл тек жаңа ғимарат емес, бұл – Арыстағы жас ұрпақтың болашағына салынған іргетас.
Біліммен қатар, бұқаралық спортты дамыту да назардан тыс қалған жоқ. Қалаға қарасты Ақдала ауылында алғаш рет спорт кешені бой көтеруде. «Ауыл – ел бесігі» бағдарламасы аясында салынған бұл кешен ауыл жастарына кәсіби спортпен айналысуға мүмкіндік бермек. Жалпы аумағы 371 шаршы метрден асатын ғимаратта волейбол, баскетбол, бокс, күрес, үстел теннисі және гимнастика сынды спорт түрлерімен шұғылдануға жағдай жасалған. Жарық әрі кең спорт залы бір мезгілде 100-ден астам адамды қабылдай алады. Кешеннің ішкі жабдықтары сапалы әрі жылу оқшаулауы жоғары материалдардан жасалған. Мұнда медициналық пункт, киім ауыстыратын бөлмелер мен санитарлық тораптар да қарастырылған.
Ақдаладағы бұл нысан – ауыл спортының дамуына тың серпін беріп қана қоймай, ауыл жастарының дені сау, белсенді азамат болып қалыптасуына жол ашатын маңызды қадам.
Сондай-ақ Арыс қаласының «Барыс» шағын ауданында жеке инвестордың қолдауымен 60 пәтерлі екі көпқабатты тұрғын үй салынуда. Құрылыс жұмыстарын «Лидер-НС Строй» ЖШС жүзеге асыруда. Жалпы ауданы 3348 шаршы метрді құрайтын бұл кешен – халықтың тұрғын үйге деген сұранысын қанағаттандыруға бағытталған маңызды бастама. Қазіргі таңда нысанда құрылыс-монтаж жұмыстары қызу жүріп жатыр. Кешеннің алғашқы үйі биыл пайдалануға берілмек.
Бұл бастамалар – Арыс қаласының әлеуметтік әлеуетін арттырып, халыққа қолайлы өмір сүру жағдайларын жасауға бағытталған нақты әрі жүйелі жұмыстардың нәтижесі. Мемлекет тарапынан жасалып жатқан қолдаулар мен жеке сектордың белсенді үлесі ел игілігіне бағытталған тұрақты дамудың көрінісін айқын көрсетіп отыр.
Арыста жүзеге асып жатқан әрбір жоба – бұл тек материалдық нысандар емес, бұл – жарқын болашаққа салынған жол. Жаңа мектеп – білімге бастар қақпа, спорт кешені – салауатты ұрпақтың мекені, ал тұрғын үйлер – берекелі отбасы ошақтарының негізі. Арыс – жаңару жолында. Ендігі межесі – өркенді даму мен өрелі ұрпақ тәрбиелеу.
